തെലുങ്ക് യുവതാരം മഹേഷ് ബാബുവിനെക്കുറിച്ച് രസകരമായ ഒരു വാര്‍ത്തയാണ് ഇപ്പോള്‍ പുറത്തുവരുന്നത്. ടൊളിവുഡില്‍ അരങ്ങുവാഴുന്ന താരത്തിന് തെലുങ്ക് എഴുതാനോ വായിക്കാനോ അറിയില്ല. മഹേഷ് ബാബു തന്നെയാണ് ഇക്കാര്യം വെളിപ്പെടുത്തിയിരിക്കുന്നത്.
പ്രാഥമിക വിദ്യാഭ്യാസം ചെന്നൈയില്‍ ആയിരുന്നതിനാല്‍ തെലുങ്ക് പഠിക്കാന്‍ കഴിഞ്ഞില്ലെന്ന് നടന്‍ പറഞ്ഞു. തമിഴ് സിനിമാ താരങ്ങളായ കാര്‍ത്തിയും വിജയ്യും മഹേഷ് ബാബുവിന്റെ സ്‌കൂള്‍ കാലഘട്ടത്തിലുള്ള സുഹൃത്തുക്കളാണ്. തന്റെ സിനിമയുടെ ഭാഗമായി നടന്ന പ്രചാരണത്തിനിടെയാണ് മഹേഷ് ബാബുവിന്റെ പ്രതികരണം.
അതേസമയം ‘സര്‍ക്കാരു വാരി പാട്ട’യാണ് മഹേഷ് ബാബുവിന്റേതായി ഒടുവില്‍ റിലീസ് ചെയ്ത ചിത്രം. മെയ് 12ന് റിലീസ് ചെയ്ത ചിത്രം ആഗോള തലത്തില്‍ 230 കോടിയാണ് നേടിയത്. കീര്‍ത്തി സുരേഷ് ആണ് സിനിമയിലെ നായിക കഥാപാത്രത്തെ അവതരിപ്പിച്ചത്.
പുതുമുഖ നടിയായ സൗമ്യ മേനോനും ചിത്രത്തില്‍ മറ്റൊരു പ്രധാന കഥാപാത്രത്തെ അവതരിപ്പിച്ചിരിക്കുന്നു. ചിത്രത്തിലെ രണ്ട് നായികമാരും മലയാളികള്‍ ആണെന്ന പ്രത്യേകത കൂടിയുണ്ട്. ഇവര്‍ക്ക് പുറമെ വെണ്ണലാ കിഷോര്‍, സമുദ്രക്കനി, സുബ്ബരാജു തുടങ്ങിയവരും ചിത്രത്തിലുണ്ട്. എസ് താമനാണ് സംഗീതം നിര്‍വ്വഹിക്കുന്നത്.