അന്തരിച്ച സംവിധായകന്‍ സച്ചിയുടെ പിറന്നാള്‍ ദിനത്തില്‍ തന്നെ അനില്‍ പി. നെടുമങ്ങാടിന്റെ ദാരുണമരണം സിനിമാലോകത്തെ കണ്ണീരണിയിച്ചിരിക്കുകയാണ്. പ്രിയപ്പെട്ട സുഹൃത്തും സഹപ്രവര്‍ത്തകനും മാഞ്ഞു പോയതിന്റെ വേദന പങ്കുവെച്ചിരിക്കുകയാണ് മേജര്‍ രവി.
“”അനിലേ, എന്റെ പ്രിയ സഹോദരാ, കഴിഞ്ഞ വര്‍ഷം നമ്മള്‍ ഒരുമിച്ച് അഭിനയിച്ചപ്പോള്‍ നല്ലൊരു നടനെ നിന്നില്‍ കണ്ടു. പിന്നെ അയ്യപ്പനും കോശിയും കണ്ടപ്പോള്‍ ഞാന്‍ സച്ചിയോട് പറഞ്ഞു നന്ദി എന്ന്… ഇപ്പോള്‍ നിങ്ങള്‍ രണ്ടുപേരും ഇല്ലാത്ത ഒരു ലോകം!!! എന്തിനാ മോനേ ഞങ്ങളെ വിട്ടു പോയത്? സഹിക്കുന്നില്ല മോനേ.. ഒരുപാട് ഇഷ്ടപ്പെടുന്നു…സച്ചിയുടെ പിറന്നാള്‍ ദിനത്തില്‍ നീ പോയത്… വയ്യ… പ്രണാമം..”” എന്നാണ് മേജര്‍ രവിയുടെ കുറിപ്പ്.
ഏഴ് വര്‍ഷമായി സിനിമാരംഗത്തുണ്ടെങ്കിലും അനിലിനെ ജനപ്രിയനാക്കിയത് അയ്യപ്പനും കോശിയും ചിത്രത്തിലെ പൊലീസ് വേഷമാണ് താരത്തെ ഏറെ ശ്രദ്ധേയനാക്കിയത്. ജോജു ജോര്‍ജ് ചിത്രം പീസിന്റെ ഷൂട്ടിംഗിനായാണ് അനില്‍ തൊടുപുഴയില്‍ എത്തിയത്.
ഷൂട്ടിംഗ് ഇടവേളയില്‍ സുഹൃത്തുക്കള്‍ക്കൊപ്പം ജലാശയത്തില്‍ കുളിക്കാനിറങ്ങിയ താരം ആഴമുള്ള കയത്തിലേക്ക് അബദ്ധത്തില്‍ വീണു പോവുകയായിരുന്നു. മമ്മൂട്ടി നായകനായ തസ്‌കരവീരന്‍ എന്ന ചിത്രത്തിലൂടെയാണ് അനില്‍ അഭിനയം ആരംഭിച്ചത്.