മമ്മൂട്ടിയും മോഹന്‍ലാലുമാണ് ഞങ്ങളുടെ പവര്‍ ഗ്രൂപ്പ് എന്ന് നടി പൊന്നമ്മ ബാബു. ഹേമാ കമ്മിറ്റി റിപ്പോര്‍ട്ടിനെ കുറിച്ച് പ്രതികരിച്ച് സംസാരിക്കവെയാണ് സിനിമയിലെ പവര്‍ ഗ്രൂപ്പ് എന്ന വിഷയത്തിലും പൊന്നമ്മ സംസാരിച്ചത്. ഹേമാ കമ്മിറ്റി ‘അമ്മ’ സംഘടനയിലെ സ്ത്രീകളെ ആരെയും സമീപിച്ചിട്ടില്ല. ജൂനിയര്‍ ആര്‍ട്ടിസ്റ്റുകള്‍ മാത്രമാണ് മൊഴി രേഖപ്പെടുത്താന്‍ പോയിട്ടുള്ളത് എന്നും പൊന്നമ്മ ബാബു വ്യക്തമാക്കി.
ഹേമ കമ്മിറ്റി അമ്മയിലെ ഒരു സ്ത്രീ അംഗത്തിനെയും സമീപിച്ചിരുന്നില്ല. ജൂനിയര്‍ ആര്‍ട്ടിസ്റ്റുകളാണ് മൊഴി രേഖപ്പെടുത്താനായി പോയിട്ടുള്ളത്. അവര്‍ ബാധിക്കപ്പെട്ടവരാണെങ്കില്‍ അവരോട് അങ്ങനെ പെരുമാറിയവര്‍ തെറ്റാണ് ചെയ്തത്. എന്നാല്‍ ഇവര്‍ യഥാര്‍ത്ഥ ഇരകള്‍ അല്ല എങ്കില്‍ ശിക്ഷ അനിവാര്യമാണ്. 222 സ്ത്രീകള്‍ അമ്മയില്‍ ഉണ്ട്, ഞങ്ങളെയാരും ഈ കമ്മീഷന്‍ വിളിച്ചിട്ടില്ല.
എന്റെ അറിവില്‍ അമ്മയിലെ സ്ത്രീകളാരും മൊഴി കൊടുത്തിട്ടില്ല. ഡബ്ല്യൂസിസിയിലെ അംഗങ്ങള്‍ ചെയ്തതെല്ലാം ശരിയാണ്. അവരെ ഒരിക്കലും കുറ്റം പറയാന്‍ സാധിക്കില്ല. ഈ ഡബ്ല്യസിസി തുടങ്ങിയ സമയത്ത് ഞങ്ങളെയാരെയും വിളിച്ചില്ല. അമ്മയിലെ സ്ത്രീകള്‍ക്ക് ഒരു ബുദ്ധിമുട്ട് ഉണ്ടാവുമ്പോള്‍ ഡബ്ല്യൂസിസി ഇടപെടാറില്ല.
ഹേമ കമ്മിറ്റിയുമായി ബന്ധപ്പെട്ട വിഷയത്തിലാണ് ഡബ്ല്യൂസിസി എന്തെങ്കിലും ചെയ്യുന്നത് കാണുന്നത്. ഏറ്റവും അധികം സ്ത്രീകള്‍ ഉള്ളത് അമ്മയിലാണ്. ഇപ്പോള്‍ ഈ റിപ്പോര്‍ട്ട് പുറത്ത് വന്നതോടെ അമ്മയിലെ മൊത്തം സ്ത്രീകള്‍ക്കും അപമാനം നേരിട്ടിരിക്കുകയാണ്. അമ്മ സംഘടനയിലെ പ്രതിസന്ധിയും എടുത്തു പറയേണ്ടതാണ്.
മോഹന്‍ലാലിന് ശേഷം ഇനിയാര് എന്നത് എല്ലാവരും ഉറ്റു നോക്കുന്ന വിഷയമാണ്. എല്ലാവരും കരുതുന്ന പോലെ പുതിയ ആളുകളെ അല്ലെങ്കില്‍ യുവ താരങ്ങളെയൊന്നും അമ്മ വിളിക്കാത്തതു കൊണ്ടല്ല. അവര്‍ എല്ലാവരും മനപ്പൂര്‍വം മാറി നില്‍ക്കുന്നതാണ്. ജനറല്‍ ബോഡിയിലൂടെ ഒരു തീരുമാനം എന്തായാലും ഉണ്ടാവും.
ഞങ്ങള്‍ എല്ലാവരും ഒറ്റക്കെട്ടായിട്ട് തന്നെ ഈ പ്രതിസന്ധിയെ നേരിടും. പിന്നെ എല്ലാവരും പറയുന്നത് പവര്‍ഗ്രൂപ്പിനെ കുറിച്ചാണ്. എന്താണ് പവര്‍ ഗ്രൂപ്പ് എന്ന് പോലും മനസിലാവുന്നില്ല. ഇനി അങ്ങനെയൊരു പവര്‍ ഗ്രൂപ്പ് ഉണ്ടെങ്കില്‍ തന്നെ ഞങ്ങള്‍ക്കത് മമ്മൂക്കയും ലാലേട്ടനുമാണ് എന്നാണ് പൊന്നമ്മ ബാബു കൗമുദി മൂവീസിന് നല്‍കിയ അഭിമുഖത്തില്‍ പറയുന്നത്.