ബിഗ് ബോസ് സീസണ്‍ 3-യുടെ വിന്നറായ മണിക്കുട്ടന്‍ മലയാളി പ്രേക്ഷകരുടെ പ്രിയ താരമാണ്. കോമഡി സ്റ്റാര്‍സ് വേദിയില്‍ എത്തിയ മണിക്കുട്ടനോട് നടന്‍ മുകേഷ് ചോദിച്ച ചോദ്യവും അതിന് താരം നല്‍കിയ മറുപടിയാണ് ഇപ്പോള്‍ ശ്രദ്ധ നേടുന്നത്. വിജയിയെ മോഹന്‍ലാല്‍ പ്രഖ്യാപിച്ചപ്പോള്‍ മണിക്കുട്ടന്‍ പൊട്ടിക്കരഞ്ഞിരുന്നു. അത് എന്തിനായിരുന്നു എന്നാണ് മുകേഷ് ചോദിക്കുന്നത്.
അമ്പിളി ദേവിയും നവ്യ നായരും യൂത്ത്ഫെസ്റ്റിവലില്‍ മത്സരിച്ചു. അമ്പിളി ദേവി കലാതിലകം ആയി. വിജയിക്കാന്‍ സാധിക്കാത്തത് കൊണ്ട് നവ്യ നായര്‍ പൊട്ടിക്കരയുന്നതും വാര്‍ത്തകളില്‍ കണ്ടു. പിറ്റേ ദിവസത്തെ പത്രത്തില്‍ നവ്യ നായര്‍ കരയുന്നത് മാത്രമേ ഉണ്ടായിരുന്നുള്ളു. കലാതിലകമായ അമ്പിളി ദേവിയുടെ പടമൊന്നുമില്ല. കിട്ടാത്ത ആളുടെ ഫോട്ടോയാണ് വന്നത്.
ഇവിടെ ഒരാളുടെ പടം ടിവിയില്‍ കണ്ടു. ഫ്ളാറ്റ് കിട്ടാത്തത് കൊണ്ടാവും കരയുന്നതെന്ന് കരുതി. പക്ഷേ കിട്ടിയത് കൊണ്ടായിരുന്നു ആ കരച്ചിലെന്ന് മുകേഷ് പറയുന്നു. ഇത്രയധികം പിന്തുണ താന്‍ പ്രതീക്ഷിച്ചിരുന്നില്ല എന്നാണ് മണിക്കുട്ടന്‍ പ്രതികരിക്കുന്നത്. ഇടയ്ക്ക് ഒരു പ്രശ്നം കാരണം മത്സരത്തില്‍ നിന്നും താന്‍ പോയിരുന്നു.
അത് കൊണ്ട് കിട്ടില്ലെന്ന് തന്നെ കരുതി. പക്ഷേ എന്നിട്ടും തന്നെ ആളുകള്‍ സ്നേഹിച്ചു. ഫ്ളാറ്റ് കിട്ടിയതിനെക്കാളും സന്തോഷമായത് ഒന്‍പതര കോടി വോട്ടിലാണ് താന്‍ ജയിച്ചത് എന്നതിലാണ്. അത്ര വലിയ സ്നേഹം മലയാളി പ്രേക്ഷകര്‍ നല്‍കിയപ്പോള്‍ തിരിച്ച് കൊടുക്കാന്‍ ഉണ്ടായിരുന്നത് തന്റെ കണ്ണീര് മാത്രമായിരുന്നുവെന്നും മണിക്കുട്ടന്‍ പറയുന്നു.