ശാരീരികമായും മാനസികമായും ഒരുപാട് സ്ട്രെയ്ൻ എടുത്ത് ചെയ്യേണ്ട ഒരു കഥാപാത്രമായിരുന്നു അത്; തുറന്നുപറഞ്ഞ് മഞ്ജു വാര്യർ

മലയാളത്തിന്റെ പ്രിയ നായികയാണ് മഞ്ജു വാര്യർ. 1995-ൽ മോഹൻ സംവിധാനം ചെയ്ത ‘സാക്ഷ്യം’ എന്നാണ് ചിത്രത്തിലൂടെയാണ് മഞ്ജു വാര്യർ സിനിമയിൽ അരങ്ങേറ്റം കുറിക്കുന്നത്. പിന്നീട് സല്ലാപം, തൂവൽകൊട്ടാരം, കളിവീട്, ഈ പുഴയും കടന്ന്, കൃഷ്ണഗുഡിയിൽ ഒരു പ്രണയക്കാലത്ത്, കളിയാട്ടം, കന്മദം, ദയ, സമ്മർ ഇൻ ബത്ലഹേം, പത്രം, കണ്ണെഴുതി പൊട്ടും തൊട്ട് തുടങ്ങീ ചിത്രങ്ങളിലൂടെ ശക്തമായ സ്ത്രീ കഥാപാത്രങ്ങളെ മഞ്ജു വാര്യർ വെള്ളിത്തിരയിൽ അവിസ്മരണീയമാക്കി.

പതിനഞ്ച് വർഷങ്ങൾക്ക് ശേഷം റോഷൻ ആൻഡ്രൂസ് സംവിധാനം ചെയ്ത ‘ഹൌ ഓൾഡ് ആർ യു’ എന്ന ചിത്രത്തിലൂടെ ശക്തമായ തിരിച്ചുവരവാണ് മഞ്ജു വാര്യർ നടത്തിയത്. ഇന്ന് ഒരുപാട് മികച്ച സിനിമകളുടെ ഭാഗമാണ് മഞ്ജു വാര്യർ. സൈജു ശ്രീധരൻ സംവിധാനം ചെയ്യുന്ന ‘ഫൂട്ടേജ്’ ആണ് മഞ്ജുവിന്റെ മലയാളത്തിലെ ഏറ്റവും പുതിയ ചിത്രം.

ഇപ്പോഴിതാ ഫൂട്ടേജിനെ കുറിച്ച് മഞ്ജു പറഞ്ഞ വാക്കുകളാണ് ചർച്ചയാവുന്നത്. ഫൗണ്ട് ഫൂട്ടേജ് ഴോൺറെയിൽ ഒരുങ്ങുന്ന ചിത്രമായതുകൊണ്ട് തന്നെ സിനിമ തിരഞ്ഞെടുക്കാൻ അതും ഒരു കാരണമായിട്ടുണ്ടെന്നാണ് മഞ്ജു വാര്യർ പറയുന്നത്. കൂടാതെ ശാരീരികമായും മാനസികമായും ഒരുപാട് സ്ട്രെയ്ൻ എടുത്ത് ചെയ്യേണ്ട ഒരു കഥാപാത്രമായിരുന്നു ഫൂട്ടേജ് എന്ന ചിത്രത്തിലേത് എന്നും മഞ്ജു വാര്യർ പറയുന്നു.

“ഇതിന്റെ ടീം തന്നെയാണ് ഈ ചിത്രത്തിലേക്ക് ആകർഷിച്ച പ്രധാന ഘടകം. ഒരു ഫൗണ്ട് ഫൂട്ടേജ് ജോണറിൽ വരുന്ന സിനിമയാണ്. അത്തരത്തിൽ ഒരു ചിത്രം ഞാനിതിന് മുമ്പ് ചെയ്തിട്ടില്ല. എല്ലാ സിനിമയും ചെയ്യുന്നതുപോലെ തന്നെ നന്നായിരിക്കും എന്ന പ്രതീക്ഷയോടെ തന്നെയാണ് ഫൂട്ടേജിന്റെയും ഭാഗമാവുന്നത്.

പക്ഷേ മറ്റു ചിത്രങ്ങളിൽ നിന്ന് വളരെ വ്യത്യസ്തമായിരുന്നു ഫൂട്ടേജിന്റെ ഷൂട്ടിങ്. നേരത്തെ പറഞ്ഞ പോലെ കണ്ടെടുക്കുന്ന ഫൂട്ടേജുകളിൽ നിന്നുള്ള ദൃശ്യങ്ങൾ മാത്രമാണ് ചിത്രത്തിൽ ഉള്ളത്. എല്ലാ സീനും ഒറ്റ ഷോട്ടിലാണ് ചിത്രീകരിച്ചിരിക്കുന്നത്. അതൊക്കെ എനിക്ക് പുതിയ അനുഭവമാണ്.”

കഥാപാത്രത്തെ കുറിച്ച് കൂടുതൽ ഒന്നും പറയാൻ പറ്റില്ല. ശാരീരികമായും മാനസികമായും ഒരുപാട് സ്ട്രെയ്ൻ എടുത്ത് ചെയ്യേണ്ട ഒരു കഥാപാത്രമായിരുന്നു. അതുകൊണ്ട് തന്നെ ഷോട്ടിന് ശേഷം സംവിധായകൻ പറയുന്ന ഓക്കെ മറ്റു സിനിമകളിൽ നിന്ന് വ്യത്യസ്തമായി തോന്നുകയും ചെയ്തിരുന്നു.” എന്നാണ് മാതൃഭൂമിക്ക് നൽകിയ അഭിമുഖത്തിൽ മഞ്ജു വാര്യർ പറഞ്ഞത്.

അതേസമയം മലയാളത്തിന് പുറമെ തമിഴിൽ മികച്ച സിനിമകളുടെ ഭാഗം കൂടിയാണ് മഞ്ജു വാര്യർ. ജയ് ഭീമിന് ശേഷം ടിജെ ജ്ഞാനവേൽ സംവിധാനം ചെയ്യുന്ന രജനികാന്ത് ചിത്രം വേട്ടയ്യൻ ഒരുങ്ങുകയാണ്.