അമിതാഭ് ബച്ചനും ശ്രീദേവിയും ഒന്നിച്ചെത്തിയ ചിത്രമാണ് ഖുദ ഗവാഹ്. 1992 ല്‍ പുറത്തിറങ്ങിയ ചിത്രം വന്‍ വിജയമായി മാറുകയും ചെയ്തിരുന്നു. മുകുള്‍ എസ് സംവിധാനം ചെയ്ത സിനിമയായിരുന്നു ഖുദ ഗവാഹ്. മനോജ് ദേശായിയായിരുന്നു സിനിമയുടെ നിര്‍മ്മാണം. ഇപ്പോഴിതാ ഈ സിനിമയുടെ പിന്നാമ്പുറ കഥകള്‍ പങ്കുവെച്ചിരിക്കുകയാണ് മനോജ് ദേശായി. അമിതാഭ് ബച്ചന്റെ അമ്മ തേജി ബച്ചനും ശ്രീദേവിയുടെ അമ്മ രാജേശ്വരി യാംഗറും തന്നെ ഭീഷണപ്പെടുത്തിയ കഥയാണ് അദ്ദേഹം പങ്കുവച്ചത്.
അഫ്ഗാനിസ്ഥാനിലായിരുന്നു സിനിമയുടെ ചിത്രീകരണം നടന്നത്. കാബുള്‍ അടക്കമുള്ള സ്ഥലങ്ങളില്‍ അന്ന് തീവ്രവാദ പ്രവര്‍ത്തനങ്ങള്‍ നിത്യസംഭവമായിരുന്നു. സിനിമയുടെ ചിത്രീകരണത്തിനായി അഫ്ഗാന്‍ പ്രധാന മന്ത്രി 18 ദിവസത്തെ പ്രത്യേക സുരക്ഷ ഒരുക്കുകയായിരുന്നു ചെയ്തിരുന്നത്. ഇതേക്കുറിച്ചാണ് മനോജ് ദേശായി മനസ് തുറന്നത്.
”അമിതാഭ് ബച്ചന്റെ അമ്മ പറഞ്ഞത്, അമിതിന് എന്തെങ്കിലും പറ്റിയിട്ട്, ജയ വെള്ള സാരി ഉടുക്കേണ്ടി വന്നാല്‍ നിങ്ങളുടെ ഭാര്യയും വെള്ള സാരിയുടുക്കും. നീ പിന്നെ തിരിച്ച് ഇങ്ങോട്ട് വരണ്ട എന്നായിരുന്നു” മനോജ് പറയുന്നു. ”ശ്രീദേവിയുടെ അമ്മയും ഭീഷണിപ്പെടുത്തി. ശ്രീയ്ക്ക് എന്തെങ്കിലും പറ്റിയാല്‍ പിന്നെ നിങ്ങള്‍ തിരികെ വരരുത്. ആരെയെങ്കിലും കൊണ്ട് നിങ്ങളെ ഞാന്‍ കൊല്ലിക്കും” എന്നും അദ്ദേഹം പറയുന്നു. എന്തായാലും സിനിമയുടെ ചിത്രീകരണം ഭംഗിയായി പൂര്‍ത്തിയാവുകയും ശ്രീയും ബച്ചനും സുരക്ഷിതരായി തിരികെ വരികയും ചെയ്തു. അദ്ദേഹം കൂട്ടിച്ചേര്‍ത്തു.