കരിയറിലെ ഏറ്റവും ലാഭവും ഏറ്റവും നഷ്ടവുമുണ്ടാക്കിയ ചിത്രങ്ങളെക്കുറിച്ച് പറഞ്ഞ് നിര്‍മ്മാതാവും നടനുമായ ദിനേശ് പണിക്കര്‍. മോഹന്‍ലാലിനെ നായകനാക്കി ലോഹിതദാസിന്റെ തിരക്കഥയില്‍ സിബി മലയില്‍ സംവിധാനം ചെയ്ത കിരീടമാണ് തനിക്ക് ഏറ്റവും ലാഭം നേടിത്തന്ന ചിത്രമെന്ന് ദിനേശ് പണിക്കര്‍ പറഞ്ഞു. മൈല്‍സ്റ്റോണ്‍ മേക്കേഴ്‌സിന് നല്‍കിയ അഭിമുഖത്തിലാണ് ദിനേശ് പണിക്കര്‍ ഇക്കാര്യം വെളിപ്പെടുത്തിയത്.
നിര്‍മ്മാതാവ് എന്ന നിലയില്‍ ഏറ്റവും ലാഭം നേടിത്തന്ന സിനിമ കിരീടമാണ്. കളക്ഷന്‍ കൂടാതെ അഞ്ച് ലക്ഷം രൂപ തമിഴ്, തെലുങ്ക് ഭാഷകളിലേക്ക് സ്റ്റോറി റൈറ്റ്‌സ് വിറ്റ വകയിലും കിട്ടി. ഏറ്റവും നഷ്ടം സ്റ്റാലിന്‍ ശിവദാസ് ആയിരുന്നു. പടത്തിന് കളക്ഷന്‍ വന്നില്ല. 50 60 ലക്ഷം രൂപ ആ സിനിമയിലൂടെ എനിക്ക് നഷ്ടമായി. ഒരു കേസും ആ സിനിമയുടെ പേരില്‍ വന്നു. രാഷ്ട്രീയപരമായിരുന്നു അത്.
ഇടത് സര്‍ക്കാരിനെയായിരുന്നു സിനിമ പിന്തുണച്ചത്. ഒരു സെന്‍സര്‍ ബോര്‍ഡ് അംഗം കോണ്‍ഗ്രസുകാരന്‍ ആയിരുന്നു. അദ്ദേഹത്തിന് ചില സീനുകളില്‍ എതിര്‍പ്പ് തോന്നി. കാരണം കോണ്‍ഗ്രസുകാരെ കുത്തുന്ന രീതിയിലുള്ള കാര്യമായിരുന്നു. ആ കേസ് നടത്താനായിട്ടും എനിക്ക് കുറേ പണച്ചെലവ് വന്നു. എല്ലാം കൂടി നോക്കുമ്പോള്‍ എനിക്ക് ഭീകരമായിട്ടുള്ള നഷ്ടം വന്നത് സ്റ്റാലിന്‍ ശിവദാസ് ആണ്- ദിനേശ് പണിക്കര്‍ പറഞ്ഞു.
Read more
ടി എസ് സുരേഷ് ബാബു സംവിധാനം ചെയ്ത് 1999-ല്‍ പുറത്തിറങ്ങിയ ചിത്രമാണ് സ്റ്റാലിന്‍ ശിവദാസ്. ചിത്രത്തില്‍ മമ്മൂട്ടിയാണ് ടൈറ്റില്‍ റോളില്‍ എത്തിയത്. മധു, ജഗദീഷ്, ഖുശ്ബു, ക്യാപ്റ്റന്‍ രാജു, നെടുമുടി വേണു, മണിയന്‍പിള്ള രാജു, ശങ്കര്‍ എന്നിവരാണ് ചിത്രത്തിലെ മറ്റ് പ്രധാന അഭിനേതാക്കള്‍ .
