മലയാളത്തിന്റെ പ്രിയപ്പെട്ട സാഹിത്യകാരനും തിരക്കഥാകൃത്തും സംവിധായകനുമായ എം ടി വാസുദേവൻ നായർ തിരക്കഥയെഴുതി, മലയാളത്തിലെ മുൻനിര സംവിധായകർ ഒരുക്കുന്ന ആന്തോളജി ചിത്രം ‘മനോരഥങ്ങൾ’ റിലീസിനൊരുങ്ങുകയാണ്. ഓണത്തിനാണ് മനോരഥങ്ങൾ പ്രേക്ഷകരിലേക്ക് എത്തുന്നത്. സീ 5-ലൂടെ ഓരോ സിനിമയായി ചിത്രം പ്രേക്ഷകർക്ക് കാണാവുന്നതാണ്. ചിത്രങ്ങളുടെ ട്രെയ്‌ലർ റിലീസ് എംടിയുടെ ജന്മദിനത്തിനായിരുന്നു പുറത്തുവിട്ടത്.
എംടിയുടെ മകളും നർത്തകിയുമായ അശ്വതി വി നായരും മനോരഥങ്ങളിലൂടെ മലയാള സിനിമയിലേക്ക് എത്തുകയാണ്. ആസിഫ് അലി, മധുബാല എന്നിവർ പ്രധാന കഥാപാത്രങ്ങളായെത്തുന്ന ‘വില്പന’യാണ് അശ്വതി സംവിധാനം ചെയ്യുന്നത്. ഇപ്പോഴിതാ ചിത്രത്തെ കുറിച്ചും സംവിധാനത്തിലേക്ക് എത്തിയത്തിനെ കുറിച്ചും സംസാരിക്കുകയാണ് അശ്വതി വി നായർ.
“യാദൃശ്ചികമായാണ് മനോരഥങ്ങളിൽ ഒരെണ്ണം സംവിധാനം ചെയ്യുന്നത്. ഒരു സ്ത്രീയുടെ മനോവിചാരങ്ങളിലൂടെ കടന്നുപോവുന്ന ചെറുകഥയാണ് വില്പന. തിരക്കഥയും സംഭാഷണവുമെല്ലാം പലവട്ടം വായിച്ചതിനാൽ കാര്യങ്ങളെല്ലാം മനഃപാഠമായിരുന്നു. എങ്കിലും സംവിധാനംചെയ്യാനുള്ള ധൈര്യമില്ലായിരുന്നു. നൃത്തവും അനുബന്ധ സ്റ്റേജ് പ്രൊഡക്‌ഷൻസുമെല്ലാം ചെയ്ത പരിചയവുമായി സിനിമചെയ്യാനിറങ്ങുന്നത് സാഹസമാണെന്ന് മനസ്സ് പറഞ്ഞുകൊണ്ടിരുന്നു. ഒപ്പമുള്ളവരാണ് ധൈര്യം നൽകിയത്. സന്തോഷ് ശിവനെ പോലുള്ളവരുടെ സഹായവും ഉപദേശവും വിലപ്പെട്ടതായിരുന്നു.
സിനിമ നന്നായെന്നും മോശമായെന്നും അച്ഛൻ പറഞ്ഞിട്ടില്ല. അത്തരം സംസാരങ്ങൾ പൊതുവേ കുറവാണ്. ഇഷ്ടമായി എന്നുതന്നെയാണ് കരുതുന്നത്. കാരണം, പ്രിവ്യൂ ഷോകൾ കണ്ടശേഷം ഒന്നുരണ്ട് സിനിമകളിലെ ചില രംഗങ്ങളിൽ വരുത്തേണ്ടുന്ന കാര്യങ്ങളെക്കുറിച്ചുള്ള അഭിപ്രായങ്ങൾ പ്രകടിപ്പിക്കുകയുംചെയ്തു. വിൽപ്പന കണ്ടശേഷം കമന്റുകളൊന്നുമുണ്ടായിരുന്നില്ല.” എന്നാണ് മാതൃഭൂമിക്ക് നൽകിയ അഭിമുഖത്തിൽ അശ്വതി പറഞ്ഞത്.
മോഹൻലാലിനെ നായകനാക്കി ‘ഓളവും തീരവും’, ബിജു മേനോൻ നായകനാവുന്ന ‘ശിലാലിഖിതം’ എന്നീ രണ്ട് ചിത്രങ്ങൾ സംവിധാനം ചെയ്യുന്നത് പ്രിയദർശൻ ആണ്.എംടിയുടെ ആത്മകഥാംശമുള്ള ‘കഡുഗണ്ണാവ ഒരു യാത്രാക്കുറിപ്പ്’ മമ്മൂട്ടിയെ നായകനാക്കി രഞ്ജിത് ആണ് സംവിധാനം ചെയ്യുന്നത്. എംടിയുടെ ഏറ്റവും മികച്ച ചെറുകഥകളിൽ ഒന്നെന്ന് വിലയിരുത്തപ്പെടുന്ന ‘ഷെർലക്ക്’ സംവിധാനം ചെയ്യുന്നത് മഹേഷ് നാരായണനും നായകനായി എത്തുന്നത് ഫഹദ് ഫാസിലുമാണ്.
സന്തോഷ് ശിവൻ സംവിധാനം ചെയ്യുന്നത് ‘അഭയം തേടി’ എന്ന ചെറുകഥയാണ്, സിദ്ദിഖ് ആണ് അഭയം തേടിയിൽ പ്രധാന കഥാപാത്രമായെത്തുന്നത്. നെടുമുടി വേണു, സുരഭി ലക്ഷ്മി, ഇന്ദ്രൻസ് എന്നിവർ പ്രധാന കഥാപാത്രങ്ങളായെത്തുന്ന ‘സ്വർഗം തുറക്കുന്ന സമയം’ സംവിധാനം ചെയ്യുന്നത് ജയരാജ് ആണ്.
ആസിഫ് അലി, മധുബാല എന്നിവർ പ്രധാന വേഷത്തിലെത്തുന്ന ‘വില്പന’യാണ് അശ്വതി സംവിധാനം ചെയ്യുന്നത്. പാർവതി തിരുവോത്ത് നായികയായെത്തുന്ന ‘കാഴ്ച’ സംവിധാനം ചെയ്യുന്നത് ശ്യാമ പ്രസാദ് ആണ്. രതീഷ് അമ്പാട്ട് സംവിധാനം ചെയ്യുന്ന ‘കടൽക്കാറ്റി’ൽ ഇന്ദ്രജിത്തും അപർണ്ണ ബാലമുരളിയുമാണ് പ്രധാന കഥാപാത്രങ്ങളായെത്തുന്നത്.
