പ്രതിഫലം കൂട്ടി ചോദിച്ചതിന്റെ പേരില്‍ ‘അമ്മ’ സംഘടന തന്നെയും വിലക്കിയിട്ടുണ്ടെന്ന് നടി നവ്യ നായര്‍. ‘പട്ടണത്തില്‍ സുന്ദരന്‍’ എന്ന സിനിമയില്‍ പ്രതിഫലം കൂട്ടി ചോദിച്ചു എന്ന് പറഞ്ഞാണ് തനിക്ക് വിലക്ക് വന്നത് എന്നാണ് നവ്യ നായര്‍ മനോരമ ഓണ്‍ലൈന് നല്‍കിയ അഭിമുഖത്തില്‍ പറയുന്നത്.
പട്ടണത്തില്‍ സുന്ദരന്‍ സിനിമയില്‍ പ്രതിഫലം കൂട്ടി ചോദിച്ചു എന്ന് പറഞ്ഞ് പ്രൊഡ്യൂസര്‍ പരാതി നല്‍കി. തനിക്കും വിലക്ക് വന്നു. തന്നെ കളിയാക്കി ബാന്‍ഡ് ക്വീന്‍ എന്നൊക്കെ വിളിക്കുമായിരുന്നു. എന്നാല്‍ അങ്ങനെയൊരു പ്രശ്‌നം ഉണ്ടായിട്ടില്ല. ശരിക്കും അതൊരു വ്യാജ വാര്‍ത്തയായിരുന്നു.
താന്‍ അങ്ങനെ പൈസ ചോദിച്ചിട്ടില്ല. പക്ഷെ അത് പിന്നീട് തെളിഞ്ഞു, താന്‍ പൈസ കൂട്ടി ചോദിച്ചതല്ലാ എന്ന്. പക്ഷെ വിലക്ക് വന്നു. അത് കഴിഞ്ഞാട്ടാണ് തന്റെ വിശദീകരണം കേട്ടത്. കേട്ട് കഴിഞ്ഞപ്പോള്‍ തന്റെ ഭാഗത്ത് തെറ്റില്ലെന്ന് മനസിലായി. വിലക്ക് നീക്കുകയും ചെയ്തു.
പക്ഷെ അങ്ങനൊരു ബാന്‍ ഉണ്ടായിട്ടുണ്ട് എന്നാണ് നവ്യ ഇപ്പോള്‍ തുറന്നു പറഞ്ഞിരിക്കുന്നത്. ഷെയ്ന്‍ നിഗം, ശ്രീനാഥ് ഭാസി എന്നീ താരങ്ങളെ വിലക്കിയതിന് പിന്നാലെയുള്ള നവ്യയുടെ വെളിപ്പെടുത്തല്‍ ശ്രദ്ധ നേടുകയാണ്. മുമ്പ് പൃഥ്വിരാജ്, തിലകന്‍ എന്നിവര്‍ക്കൊക്കെ സിനിമയില്‍ വിലക്ക് വന്നിരുന്നു.
അതേസമയം, ‘ജാനകി ജാനേ’ എന്ന സിനിമയുടെ പ്രൊമോഷന്‍ തിരക്കുകളിലാണ് നവ്യ ഇപ്പോള്‍. സൈജു കുറുപ്പും നവ്യയും പ്രധാന കഥാപാത്രങ്ങളെ അവതരിപ്പിക്കുന്ന ചിത്രം മെയ് 12ന് ആണ് റിലീസ് ചെയ്യുന്നത്. അനീഷ് ഉപാസനയാണ് ചിത്രത്തിന്റെ രചനയും സംവിധാനവും.