തെന്നിന്ത്യയിലെ ലേഡി സൂപ്പര്‍ സ്റ്റാര്‍ ആണ് നയന്‍താര. എന്നാല്‍ ലേഡി സൂപ്പര്‍ സ്റ്റാര്‍ എന്ന വിശേഷണം തനിക്ക് നല്‍കരുതെന്ന് തുറന്നു പറഞ്ഞിരിക്കുകയാണ് നയന്‍താര ഇപ്പോള്‍. അങ്ങനെയൊരു വിശേഷണം തനിക്ക് ഇഷ്ടമല്ല എന്നാണ് നയന്‍താര പറയുന്നത്. ‘അന്നപൂരണി’ എന്ന ചിത്രത്തിന്റെ പ്രമോഷന്റെ ഭാഗമായി നല്‍കിയ അഭിമുഖത്തിലാണ് താരം സംസാരിച്ചത്.
അഭിമുഖത്തിനിടെ അവതാരക നയന്‍താരയെ ലേഡി സൂപ്പര്‍ സ്റ്റാര്‍ എന്ന് വിളിച്ച് വിശേഷിപ്പിക്കുകയായിരുന്നു. ”ഒരു ചിരിയോടെയായിരുന്നു നയന്‍താരയുടെ മറുപടി. ദയവായി എന്നെ അങ്ങനെ വിളിക്കരുത്. ആരെങ്കിലും അങ്ങനെ എന്നെ കുറിച്ച് പറയുമ്പോള്‍ എനിക്ക് തോന്നുന്നത് യഥാര്‍ഥത്തില്‍ അവര്‍ ആക്ഷേപിക്കുന്നത് പോലെയാണ്” എന്നാണ് നയന്‍താര പറയുന്നത്.
താരത്തിന്റെ ഈ വാക്കുകള്‍ സോഷ്യല്‍ മീഡിയയില്‍ ശ്രദ്ധ നേടുന്നുണ്ട്. സിനിമയാണ് തനിക്ക് ആദരം നല്‍കുന്നതെന്നും നയന്‍താര പറയുന്നുണ്ട്. ”ഇന്ന് ഞാന്‍ ആയത് എല്ലാത്തിനും സിനിമയാണ് കാരണം. പ്രശസ്തിയും ആദരവും എല്ലാം എനിക്ക് സിനിമയാണ് തന്നത്” എന്നാണ് നയന്‍താര പറയുന്നത്.
അതേസമയം, നയന്‍താരയെ നായികയാക്കി നിലേഷ് കൃഷ്ണ സംവിധാനം ചെയ്ത അന്നപൂരണി മികച്ച പ്രതികരണത്തോടെ പ്രദര്‍ശനം തുടരുകയാണ്. നയന്‍താരയുടെ മികച്ച ഒരു സിനിമയാണ് അന്നപൂരണി എന്നാണ് പ്രേക്ഷകരും അഭിപ്രായപ്പെടുന്നത്.
ഒരു ഷെഫ് ആയാണ് ചിത്രത്തില്‍ നയന്‍താര വേഷമിട്ടിരിക്കുന്നത്. ജതിന്‍ സേതിയാണ് നിര്‍മാണം. ജയ് നായകനായി എത്തിയ ചിത്രത്തില്‍ കെ.എസ് രവികുമാര്‍, സുരേഷ് ചക്രവര്‍ത്തി, അച്യുത് കുമാര്‍, ആരതി ദേശായി, രേണുക എന്നിവരും പ്രധാന കഥാപാത്രങ്ങളായി എത്തുന്നുണ്ട്.