‘പുഷ്പ 2’ ട്രെയ്‌ലര്‍ എത്തിയപ്പോള്‍ ഫഹദ് ഫാസിലിന്റെ മിന്നും പ്രകടനം പ്രേക്ഷകര്‍ ആഘോഷമാക്കുകയാണ്. എന്നാല്‍ സ്വന്തം അഭിനയത്തില്‍ ഫഹദ് അത്ര കോണ്‍ഫിഡന്റ് അല്ല. ഫഹദിന്റെ ഭാര്യയും നടിയുമായ നസ്രിയയാണ് ഇക്കാര്യം തുറന്നു പറഞ്ഞിരിക്കുന്നത്. തന്റെ അഭിനയത്തില്‍ വിശ്വാസമില്ലാത്തതിനാല്‍ സ്വയം മെച്ചപ്പെടുത്താനുള്ള ശ്രമത്തിലാണ് ഫഹദ് എന്നാണ് നസ്രിയ പറയുന്നത്.
ഫഹദിന് താന്‍ ഒരു നല്ല ആക്ടറാണെന്ന വിശ്വാസമില്ല. ആദ്യ സിനിമയും അതിന് ശേഷം ഇവിടെ നിന്ന് മാറി നിന്നതും, തിരിച്ചുവന്നു സ്വയം തെളിയിച്ചതും, അതെല്ലാമായിരിക്കാം ഒരുപക്ഷെ അതിന് കാരണം. ചെയ്യുന്ന പരിപാടി താന്‍ നല്ല രീതിയിലാണ് ചെയ്യുന്നതെന്ന് ഫഹദ് കരുതുന്നില്ല.
അതുകൊണ്ട് എപ്പോഴും അദ്ദേഹം തന്റെ ക്രാഫ്റ്റ് കൂടുതല്‍ മികച്ചതാക്കാന്‍ ശ്രമിക്കും. പ്രത്യേക താല്‍പര്യം കൊണ്ടുന്നുമല്ല ഇത് പറയുന്നത്. ഇതേ പറ്റി ചോദിച്ചാല്‍ ഷാനു പറയുന്നത് എനിക്ക് ഇതല്ലാതെ വേറെ പണിയൊന്നുമറിയില്ല മോളേ എന്നാണ്. ഫഹദിന്റെ ആക്ടിങ്ങിന്റെ രഹസ്യമിതാണ് എന്നാണ് ഞാന്‍ കരുതുന്നത് എന്ന് നസ്രിയ പറഞ്ഞു.
ബേസിലിനൊപ്പം നസ്രിയ പ്രധാന വേഷത്തിലെത്തുന്ന സൂക്ഷ്മദര്‍ശിനി എന്ന സിനിമയുടെ പ്രമോഷന്റെ ഭാഗമായി നല്‍കിയ അഭിമുഖത്തിലാണ് നടി സംസാരിച്ചത്. അതേസമയം, പുഷ്പ 2വിനെ കുറിച്ചും നസ്രിയ സംസാരിക്കുന്നുണ്ട്. ഒരു ആരാധിക എന്ന നിലയില്‍ ഫഹദ് എല്ലാ സിനിമയിലും ഞെട്ടിക്കുമെന്നാണ് താന്‍ കരുതുന്നത്.
പുഷ്പ ആദ്യ ഭാഗത്തേക്കാള്‍ രണ്ടാം ഭാഗത്തിലാണ് ഫഹദ് കൂടുതലുള്ളത്. പുഷ്പ 1 ഒരു ഇന്‍ട്രോ പോലെയായിരുന്നു. പുഷ്പ 2വിലാണ് യഥാര്‍ത്ഥ ഫാഫയെ കാണാന്‍ പറ്റുക എന്നാണ് നസ്രിയ പറഞ്ഞത്. ഡിസംബര്‍ 5ന് ആണ് പുഷ്പ 2 തിയേറ്ററുകളിലേക്ക് എത്തുന്നത്.