ഒരു ചെറിയ ഇടവേളയ്ക്ക് ശേഷം നസ്രിയ നസീമിന്റെ തിരിച്ചുവരവിന് വഴിയൊരുക്കിയ ചിത്രമാണ് ട്രാന്‍സ്. ഫഹദ് ഫാസില്‍ നായകനായി എത്തിയ ചിത്രത്തില്‍ നസ്രിയയാരുന്നു നായിക. ബാഗ്ലൂര്‍ ഡെയ്‌സിന് ശേഷം ഇരുവരും വീണ്ടുമൊന്നിച്ച ചിത്രമായിരുന്നു ഇത്. ഇതുവരെ നസ്രിയയുടേതായി കാണാത്ത വ്യത്യസ്തമായ വേഷപകര്‍ച്ചയായിരുന്നു ട്രാന്‍സിലെ എസ്തര്‍. പുകവലിയും മദ്യപാനവുമൊക്കെയായി അള്‍ട്രാ മോഡേണ്‍ സ്‌റ്റൈലിലാണ് നസ്രിയ ചിത്രത്തില്‍ എത്തിയത്. ഇത്തരം വേഷങ്ങള്‍ ചെയ്യാന്‍ ആരും സമീപിക്കാത്തതുകൊണ്ടാണ് ഇതുവരെ ചെയ്യാതിരുന്നതെന്നാണ് നസ്രിയ പറയുന്നത്.
“സത്യം പറഞ്ഞാല്‍, ഇതുപോലുള്ള ഒരു കഥാപാത്രം ചെയ്യാന്‍ ആരെങ്കിലും എന്നെ സമീപിക്കുന്നത് ഇതാദ്യമാണ്. ഞാന്‍ അത്തരം വേഷങ്ങള്‍ ചെയ്യില്ലെന്ന് തീരുമാനമെടുത്തിട്ടൊന്നുമില്ലായിരുന്നു. കഥാപാത്രത്തേക്കാള്‍ അവളുടെ ശീലങ്ങളാണ് എനിക്ക് കൂടുതല്‍ ആശങ്കയുണ്ടാക്കിയത്. അത് പുകവലിയോ മദ്യപാനമോ ആകട്ടെ, ഞങ്ങള്‍ ചിത്രീകരണം ആരംഭിക്കുന്നതിന് മുമ്പ് അവ ശരിയാക്കണമെന്ന് ഞാന്‍ ആഗ്രഹിച്ചിരുന്നു.” ടൈംസ് ഓഫ് ഇന്ത്യയുമായുള്ള അഭിമുഖത്തില്‍ നസ്രിയ പറഞ്ഞു.
അന്‍വര്‍ റഷീദ് ഒരുക്കിയ ചിത്രത്തിന് അമല്‍ നീരദാണ് ഛായാഗ്രഹണം നിര്‍വ്വഹിച്ചത്. വിന്റ്‌സന്റ് വടക്കനാണ് തിരക്കഥ. റസൂല്‍ പൂക്കുട്ടിയാണ് സൗണ്ട് ഡിസൈന്‍. സുഷിന്‍ ശ്യാമും ജാക്‌സണ്‍ വിജയനും ചേര്‍ന്നാണ് പശ്ചാത്തല സംഗീതമൊരുയിരിക്കുന്നത്.