‘ജയിലര്‍’ സിനിമയ്ക്ക് കേരളത്തില്‍ നിന്നും ലഭിക്കുന്ന പ്രതികരണങ്ങള്‍ തന്നെ അറിയിക്കാന്‍ മോഹന്‍ലാല്‍ സാര്‍ വിളിച്ചിരുന്നുവെന്ന് നെല്‍സണ്‍ പറഞ്ഞിരുന്നു. മോഹന്‍ലാലിനെ കാസ്റ്റ് ചെയ്യണമെന്ന് ആദ്യമേ മനസിലുണ്ടായിരുന്നുവെന്നും നെല്‍സണ്‍ വ്യക്തമാക്കിയിരുന്നു. താരത്തിനൊപ്പമുള്ള ഷൂട്ടിംഗ് അനുഭവങ്ങളാണ് നെല്‍സണ്‍ പങ്കുവച്ചരിക്കുന്നത്.
”മോഹന്‍ലാല്‍ സ്വാഭാവികമായി മാത്രം അഭിനയിക്കുന്ന ഒരു നടനാണ്. അദ്ദേഹത്തിന്റെ ഒരു സീന്‍ എടുക്കുന്നതിന് ഇടയില്‍ പെട്ടെന്ന് അദ്ദേഹം കട്ട് വിളിച്ചു. എന്താണ് കാര്യമെന്ന് മനസിലായില്ല. ഇത് ടേക്കായിരുന്നോ എന്ന് അദ്ദേഹം ചോദിച്ചു. അതെ എന്ന് ഞാന്‍ മറുപടി പറഞ്ഞു. സത്യത്തില്‍ ലാല്‍ സര്‍ അത് റിഹേഴ്സലാണെന്നാണ് കരുതിയത്.”
”അദ്ദേഹം അഭിനയിക്കുകയാണോ റിഹേഴ്‌സല്‍ എടുക്കുകയാണോ എന്ന് ഞങ്ങള്‍ക്ക് മനസിലായില്ല. അത്രയ്ക്ക് സ്വാഭാവികതയോടെയാണ് അദ്ദേഹം അഭിനയിക്കുന്നത്. ബ്രില്യന്റ് നടനാണ് ലാല്‍ സാറെന്ന് അപ്പോള്‍ കണ്ടിരുന്നവരൊക്കെ പറഞ്ഞു. എക്‌സട്രാ ഓര്‍ഡിനറി നടനാണ് അദ്ദേഹം.”
”അതൊന്നും ഞാന്‍ പറയേണ്ട കാര്യമില്ല, അദ്ദേഹത്തിന്റെ പ്രകടനം കാണുന്നവര്‍ക്കൊക്കെ അത് അറിയാം. എനിക്കും വലിയൊരു എക്‌സ്പീരിയന്‍സ് ആയിരുന്നു അത്. നമുക്ക് എന്താണോ വേണ്ടത് അത് ലൈറ്റായിട്ട് അദ്ദേഹത്തിനോട് പറഞ്ഞാല്‍ മതി. അത് നമ്മുടെ പ്രതീക്ഷകള്‍ക്കും അപ്പുറം ചെയ്ത് വയ്ക്കും ലാല്‍ സാര്‍.”
”പിന്നെ ഭയങ്കര സിംപിളായ ഒരു നല്ല മനുഷ്യനാണ് അദ്ദേഹം. എപ്പോഴും ഉത്സാഹവാനായിരിക്കും. എന്നിട്ട് ചുറ്റുപാടും ഉള്ളവരിലേക്കും ആ പോസിറ്റീവ് എനര്‍ജി പകരും. അസിസറ്റന്റ് ഡയറക്ടര്‍ മുതല്‍ എല്ലാ സാങ്കേതിക പ്രവര്‍ത്തകരെയും വളരെ കംഫര്‍ട്ടബിളാക്കി നിര്‍ത്തുന്നതാണ് അദ്ദേഹത്തിന്റെ പ്രത്യേകത” എന്നാണ് നെല്‍സണ്‍ ഒരു അഭിമുഖത്തില്‍ പറയുന്നത്.