ദുല്‍ഖറിന്റെ ജന്മദിനമായ ഇന്ന് സഹതാരങ്ങളും ആരാധകരും സിനിമാമേഖലയിലുള്ള പ്രവര്‍ത്തകരെല്ലാം തന്നെ സോഷ്യല്‍ മീഡിയയില്‍ ആശംസകള്‍ പങ്കുവെച്ചിരിക്കുകയാണ്. ഒട്ടേറെ താരങ്ങളാണ് ദുല്‍ഖറിന്റെ ഫോട്ടോ ഷെയര്‍ ചെയ്തിരിക്കുന്നത്. ദുല്‍ഖറിന്റെ കാരുണ്യത്തെ കുറിച്ചാണ് നടന്‍ നിര്‍മല്‍ പാലാഴിക്ക് പറയാനുള്ളത്.
“സലാല മൊബൈല്‍സ്”എന്ന സിനിമയില്‍ ഒരു ചെറിയ സീനില്‍ അഭിനയിച്ചിട്ടുള്ള പരിചയമേ ഉള്ളു. പിന്നെ എപ്പോഴെങ്കിലും കണ്ടാല്‍ ഞാന്‍ അന്ന് കൂടെ അഭിനയിച്ചിരുന്ന ആള്‍ എന്ന് പറഞ്ഞു പരിചയപ്പെടുത്തേണ്ടിവരും എന്നൊക്കെ കരുതി ഒരു ഫോട്ടോ എടുത്ത് പിരിഞ്ഞതായിരുന്നു.
പക്ഷെ 2014ല്‍ ആക്‌സിഡന്റ് പറ്റിയപ്പോ പ്രതീക്ഷിക്കാത്ത ഒരു തുക അക്കൗണ്ടില്‍ ദുല്‍ഖര്‍ വകയായി എത്തിയിരുന്നു. എഴുന്നേറ്റ് ശരിയാവും വരെ എന്റെ ആരോഗ്യ സ്ഥിതി അലക്‌സ് ഏട്ടന്‍ വഴിയും നേരിട്ട് വിളിച്ചും അന്വേഷിച്ചു കൊണ്ടിരുന്നു.നന്ദിയും സ്‌നേഹവും കടപ്പാടും മാത്രം.ജീവിതത്തില്‍ എല്ലാവിധ ഐശ്വര്യങ്ങളും ഉണ്ടാവട്ടെ എന്ന് പ്രാര്‍ത്ഥിക്കുന്നു- നിര്‍മല്‍ പാലാഴി എഴുതുന്നു.
സല്യൂട്ട് ആണ് ദുല്‍ഖര്‍ ഏറ്റവും ഒടുവില്‍ അഭിനയിച്ച ചിത്രം.റിലീസ് ചെയ്യാനുള്ള ചിത്രം ശ്രീനാഥ് രാജേന്ദ്രന്‍ സംവിധാനം ചെയ്ത കുറുപ്പ് ആണ്.