ഡിസ്നി പ്ലസ് ഹോട്സ്റ്റാറിന്‍റെ നാലാമത്തെ മലയാളം വെബ് സീരീസായ ‘നാഗേന്ദ്രൻസ് ഹണിമൂൺസ്’ സ്ട്രീമിംഗ് ആരംഭിച്ചിരിക്കുകയാണ്. നിതിൻ രഞ്ജിപണിക്കാരാണ് സീരീസ് സംവിധാനം ചെയ്തിരിക്കുന്നത്. കാവൽ, കസബ എന്നീ ചിത്രങ്ങൾക്ക് ശേഷം നിതിൻ രഞ്ജിപണിക്കർ സംവിധാനം ചെയ്യുന്ന പുതിയ പ്രോജക്ട് ആണിത്.
ഇപ്പോഴിതാ സെൻസർ ബോർഡിനെ കുറിച്ചും, പ്രേക്ഷകരെ കുറിച്ചും സംസാരിക്കുകയാണ് നിതിൻ. സെൻസർ ബോർഡിനേക്കാൾ സെൻസിറ്റീവായ ആളുകളാണ് പ്രശ്നമെന്നും, എല്ലാവരെയും തൃപ്തിപ്പെടുത്തികൊണ്ട് സിനിമ ചെയ്യാൻ കഴിയില്ലെന്നും നിതിൻ പറയുന്നു.
“സെന്‍സര്‍ബോര്‍ഡ് എന്ന പറഞ്ഞാല്‍ ഭീകരമായിട്ടുള്ള എന്തോ ഒന്നാണെന്നാണ് കുട്ടിക്കാലത്ത് ഞാന്‍ ധരിച്ചുവെച്ചത്. കാരണം, അച്ഛന്റെ ഓരോ സനിമ ഇറങ്ങുന്ന സമയത്തും സെന്‍സര്‍ബോര്‍ഡുമായിട്ട് എന്തെങ്കിലും പ്രശ്‌നമുണ്ടാകും. റിലീസിന്റെ തലേദിവസമാണ് സാധരണ എല്ലാവരും ടെന്‍ഷനടിക്കാറ്. പക്ഷേ അച്ഛന്റെ കാര്യത്തില്‍ ഏറ്റവും ടെന്‍ഷന്‍ സെന്‍സര്‍ ചെയ്യുന്ന ദിവസമാണ് വീട്ടിലെല്ലാവര്‍ക്കും ടെന്‍ഷന്‍
ഇപ്പോള്‍ സെന്‍സര്‍ബോര്‍ഡിനെക്കാള്‍ പ്രശ്‌നം വേറെ ചില ആളുകള്‍ക്കാണ്. സിനിമയിലെ ഏതെങ്കിലും സീന്‍ കണ്ടിട്ട് അവരെപ്പറ്റിയാണ് പറഞ്ഞതെന്ന് ആരോപിച്ച് സിനിമക്കെതിരെ തിരിയും. അങ്ങനെ പറയാന്‍ പാടില്ല, ഇങ്ങനെ പറയാന്‍ പാടില്ല എന്നൊക്കെ കുറെ റെസ്ട്രിക്ഷന്‍സ് ഇവര്‍ വെക്കും. അതൊക്കെ വളരെ മോശമാണ്. എല്ലാവരെയും തൃപ്തിപ്പെടുത്തിക്കൊണ്ട് ഒരു സിനിമ സാധ്യമല്ല. ഈയടുത്ത് കണ്ടതില്‍ എനിക്ക് ഏറ്റവും ഇഷ്ടപ്പെട്ട സിനിമ അനിമലാണ്. നാല് തവണ ഞാനത് തിയേറ്ററില്‍ നിന്ന് കണ്ടു.” എന്നാണ് വണ്ടർവാൾ മീഡിയക്ക് നൽകിയ അഭിമുഖത്തിൽ നിതിൻ രഞ്ജിപണിക്കർ പറഞ്ഞത്.
അതേസമയം ഡിസ്നി പ്ലസ് ഹോട്സ്റ്റാറിന്‍റെ നാലാമത്തെ മലയാളം വെബ് സീരീസാണ് നാഗേന്ദ്രൻസ് ഹണിമൂൺ കോമഡി- എന്റർടൈനർ ഴോണറിലാണ് സീരീസ് ഒരുക്കിയിരിക്കുന്നത്. ഗ്രേസ് ആന്റണി, ശ്വേതാ മേനോൻ, കനി കുസൃതി, അൽഫി പഞ്ഞിക്കാരൻ, പ്രശാന്ത് അലക്സാണ്ടർ, കലാഭവൻ ഷാജോൺ, രമേശ് പിഷാരടി, നിരഞ്ജനാ അനൂപ്, അമ്മു അഭിരാമി, ജനാർദനൻ തുടങ്ങീ വൻ താരനിരയാണ് സുരാജ് വെഞ്ഞാറമൂട് പ്രധാന കഥാപാത്രമായെത്തുന്ന വെബ് സീരീസിൽ അണിനിരക്കുന്നത്. കേരള ക്രൈം ഫയല്‍, മാസ്റ്റര്‍ പീസ്, പെരല്ലൂര്‍ പ്രീമിയര്‍ ലീഗ് എന്നിവയാണ് ഡിസ്നി പ്ലസ് ഹോട്സ്റ്റാറിൽ സ്ട്രീം ചെയ്ത മലയാളം വെബ് സീരീസുകൾ.