ഫഹദ് ഫാസിലും സായ് പല്ലവിയും ആദ്യമായി ഒരുമിച്ച് അഭിനയിക്കുന്ന ചിത്രമാണ് “അതിരന്‍”. “പ്രേമം”, “കലി” എന്നീ ചിത്രങ്ങളില്‍ അഭിനയിച്ച ശേഷം സായ് പല്ലവി മലയാളത്തിലേക്ക് തിരിച്ചെത്തുന്ന ചിത്രം കൂടിയാണിത്. ഈമയൗ എന്ന സിനിമയിലൂടെ ശ്രദ്ധേയനായ പി എഫ് മാത്യൂസിന്റെ തിരക്കഥയില്‍ നവാഗതനായ വിവേക് ആണ് ചിത്രം സംവിധാനം ചെയ്യുന്നത്. റൊമാന്റിക് ത്രില്ലര്‍ എന്ന് വിളിക്കാവുന്ന ചിത്രമാണ് “അതിരന്‍” എന്നാണ് പി.എഫ് മാത്യൂസ് പറയുന്നത്.
“ഒരു മാനസിക രോഗാശുപത്രിയും അതിന്റെ ചുറ്റുവട്ടവുമൊക്കെ പശ്ചാത്തലമാക്കി വികസിക്കുന്ന കഥയാണ് സിനിമയുടേത്. ഊട്ടിയിലായിരുന്നു പ്രധാന ചിത്രീകരണം. ഫഹദിന്റെ കഥാപാത്രം ഒരു ഡോക്ടറാണ്. തിരക്കഥയെഴുതുമ്പോള്‍ തന്നെ ഫഹദിനെ നായകനായി തീരുമാനിച്ചിരുന്നു. എന്നാല്‍ ഏതെങ്കിലുമൊരു കഥാപാത്രത്തേക്കാള്‍ കഥയ്ക്ക് പ്രാധാന്യമുള്ള സിനിമയാണ് അതിരന്‍.” ഏഷ്യാനെറ്റുമായുള്ള അഭിമുഖത്തില്‍ പി.എഫ് മാത്യൂസ് പറഞ്ഞു.
വാള്‍ട്ട് ഡിസ്‌നിയില്‍ പ്രവര്‍ത്തിച്ചിട്ടുള്ള വിവേകിന്റെ ആദ്യ സംവിധാന സംരംഭമാണ് അതിരന്‍. പ്രകാശ് രാജ്, അതുല്‍ കുല്‍ക്കര്‍ണി, ലെന, രഞ്ജി പണിക്കര്‍, ശാന്തി കൃഷ്ണ തുടങ്ങിയവര്‍ ചിത്രത്തിലുണ്ട്. അനു മൂത്തേടനാണ് ചിത്രത്തിന്റെ ഛായാഗ്രഹണം നിര്‍വഹിക്കുന്നത്. പി.എസ്. ജയഹരിയുടേതാണ് സംഗീതം. പ്രശസ്ത തമിഴ് സംഗീത സംവിധായകനായ ജിബ്രാനാണ് പശ്ചാത്തല സംഗീതം ഒരുക്കുന്നത്.