നടന്‍ ജയറാമിന്റെ കുടുംബത്തില്‍ വിവാഹ സീസണ്‍. ജയറാമിന്റെയും പാര്‍വതിയുടെയും മകന്‍ കാളിദാസിന്റെ വിവാഹ നിശ്ചയം കഴിഞ്ഞ ആഴ്ചയായിരുന്നു നടന്നത്. മോഡല്‍ താരിണി കലിംഗരായരാണ് കാളിദാസിന്റെ ഭാവി വധു. വിവാഹനിശ്ചയത്തിന്റെ ചിത്രങ്ങളും വീഡിയോയുമെല്ലാം വൈറലായിരുന്നു.
എന്നാല്‍ മകന്റെ വിവാഹമല്ല, ആദ്യം മകള്‍ മാളവികയുടെ വിവാഹമാണ് നടക്കുകയെന്ന് വ്യക്തമാക്കിയിരിക്കുകയാണ് പാര്‍വതി. ഇന്നലെ തിരുവനന്തപുരത്ത് മുന്‍കാല നടി രാധയുടെ മകള്‍ കാര്‍ത്തികയുടെ വിവാഹം കൂടാനാണ് പാര്‍വതി എത്തിയത്. മക്കളുടെ വിവാഹത്തെ കുറിച്ച്, വളരെ ചുരുങ്ങിയ വാക്കുകളിലാണ് നടി പ്രതികരിച്ചത്.
‘മോന്റെ കല്യാണം ഉടനെയില്ല, മോള്‌ടെയാണ് ആദ്യം’ എന്നാണ് പാര്‍വതി പറഞ്ഞത്. നവംബര്‍ പത്തിന് ആയിരുന്നു കാളിദാസ് ജയറാമും തരിണി കലിംഗരായരും തമ്മിലുള്ള വിവാഹനിശ്ചയം നടന്നത്. ഇരുവരുടെയും പ്രണയവാര്‍ത്തയും ചിത്രങ്ങളും സോഷ്യല്‍ മീഡിയയില്‍ ആരാധകര്‍ ഏറ്റെടുത്തിരുന്നു.
പിന്നാലെയാണ് ഒരു യുവാവിനൊപ്പമുള്ള ചിത്രം പങ്കുവച്ച് മാളവികയും എത്തിയത്. മാളവിക പങ്കുവച്ച പോസ്റ്റിന് താഴെ കാളിദാസ് അളിയന്‍ എന്ന കമന്റ് ഇട്ടതോടെയാണ് ഇത് മാളവികയുടെ ഭാവി വരനാകും എന്ന നിഗമനത്തിലേക്ക് സോഷ്യല്‍ മീഡിയ എത്തിയത്.
