വൃക്കകള്‍ തകരാറിലായി അപകടനിലയിലായിരുന്ന തമിഴ് നടന്‍ പൊന്നമ്പലം സാധാരണ ജീവിതത്തിലേക്ക് തിരിച്ചെത്തിയിരിക്കുകയാണ് വൃക്കകളുടെ പ്രവര്‍ത്തനം നിലച്ച് അത്യാസന്ന നിലയില്‍ ആശുപത്രിയിലായ അദ്ദേഹത്തിന് വൃക്കമാറ്റിവെക്കല്‍ ശസ്ത്രക്രിയ നടത്തിയത് ഫെബ്രുവരി മാസത്തില്‍ ആയിരുന്നു. ഇപ്പോഴിതാ ഒരു പുതിയ അഭിമുഖത്തില്‍ ആ പ്രതിസന്ധി ഘട്ടത്തില്‍ തനിക്ക് ഏറ്റവും വലിയ സഹായം നല്‍കിയ താരത്തെക്കുറിച്ച് പറഞ്ഞിരിക്കുകയാണ് പൊന്നമ്പലം.
തെലുങ്ക് സൂപ്പര്‍താരം ചിരഞ്ജീവിയാണ് അസുഖ സമയത്ത് തന്നെ ഏറ്റവും പരിഗണിച്ചതെന്ന് പറയുന്നു പൊന്നമ്പലം. 40 ലക്ഷം രൂപയാണ് അദ്ദേഹം നല്‍കിയതെന്നും പറയുന്നു. അദ്ദേഹം രണ്ടോ മൂന്നോ ലക്ഷം നല്‍കുമെന്നാണ് ഞാന്‍ കരുതിയിരുന്നത്. പക്ഷേ ചിരഞ്ജീവി സാര്‍ അതിനൊക്കെ അപ്പുറം പോയി. 40 ലക്ഷം രൂപയാണ് ആശുപത്രി കിടക്കയില്‍ കഴിഞ്ഞ എനിക്ക് അദ്ദേഹം നല്‍കിയത്. ആ സഹായം ഞാന്‍ ഒരിക്കലും മറക്കില്ല. എന്റെ ഹൃദയത്തിന്റെ അടിത്തട്ടില്‍ നിന്നാണ് ഞാന്‍ അദ്ദേഹത്തിന് നന്ദി പറഞ്ഞത്, പൊന്നമ്പലം അഭിമുഖത്തില്‍ പറഞ്ഞു
താന്‍ മദ്യപിച്ചും ലഹരി ഉപയോഗിച്ചും വൃക്ക തകരാറിലാക്കിയെന്നാണ് പലരും കരുതിയതെന്നും എന്നാല്‍ യാഥാര്‍ഥ്യം തന്റെ ഒരു അടുത്ത ബന്ധു ബിയറില്‍ വിഷം കലക്കി നല്‍കിയതയാണ് തന്റെ ആരോഗ്യ താറുമാറാക്കിയതെന്ന് പൊന്നമ്പലം ഈയിടെ വെളിപ്പെടുത്തിയിരുന്നു. പല താരങ്ങളില്‍ നിന്നും അവശ്യ സമയത്ത് ലഭിച്ച സഹായത്തെക്കുറിച്ചും അദ്ദേഹം പറഞ്ഞിരുന്നു.