സൂപ്പര്‍ സ്റ്റാര്‍ രജനികാന്തിന്റെ സ്റ്റൈലും നൃത്തവുമൊക്കെ കാണുന്നത് ഇന്നും ആരാധകര്‍ക്ക് ആവേശമാണ്. രജനികാന്തിനെ കുറിച്ച് നടനും കൊറിയോഗ്രാഫറുമായ പ്രഭുദേവ പങ്കുവച്ച കാര്യമാണ് ഇപ്പോള്‍ ശ്രദ്ധ നേടിക്കൊണ്ടിരിക്കുന്നത്. രജിനികാന്തിന് നൃത്തം ചെയ്യുന്നത് ഭയമാണ് എന്നാണ് പ്രഭുദേവ വെളിപ്പെടുത്തിയിരിക്കുന്നത്.
നൃത്തസംവിധായകരോട് രജിനി സാറിന് വലിയ ബഹുമാനമാണ്. എല്ലാവര്‍ക്കും അദ്ദേഹത്തെ ഇഷ്ടമാണ്. എപ്പോഴും സന്തോഷത്തോടെ നടക്കുന്നയാളാണ് രജിനി സാര്‍. പക്ഷേ പാട്ട് എന്ന് കേട്ടാല്‍ റോബോട്ടിനെ പോലെയാവും. കാലില്‍ ഒരു പത്തിരുപത് കിലോ കെട്ടിവെച്ചാല്‍ എങ്ങനെയുണ്ടാവും എന്നതുപോലെ.
ഭയങ്കര ടെന്‍ഷനായിരിക്കും ആ സമയങ്ങളില്‍. എന്തിനാണ് ഇങ്ങനെ ടെന്‍ഷനടിക്കുന്നതെന്ന് ഞാന്‍ ചോദിച്ചിട്ടുണ്ട്. അറിയില്ല, പാട്ടെന്നുകേട്ടാല്‍ അപ്പോള്‍ ടെന്‍ഷനാവും എന്നായിരിക്കും സാറിന്റെ മറുപടി. എന്നാല്‍ എപ്പോഴും ജോളിയായിരിക്കുന്ന വളരെ ലാളിത്യം നിറഞ്ഞയാളാണ് രജിനികാന്ത് എന്നാണ് പ്രഭുദേവ ബിഹൈന്‍ഡ്‌വുഡ്‌സിന് നല്‍കിയ അഭിമുഖത്തില്‍ പറയുന്നത്.
അതേസമയം, ‘ജയിലര്‍’ ആയിരുന്നു രജനിയുടെതായി ഒടുവില്‍ തിയേറ്ററുകളില്‍ എത്തിയ ചിത്രം. ബോക്‌സ് ഓഫീസില്‍ 607 കോടി നേടിയ ചിത്രം തമിഴിലെ ഹൈയെസ്റ്റ് ഗ്രോസിങ് ചിത്രങ്ങളില്‍ ഒന്നാണ്. ടി.ജെ. ജ്ഞാനവേല്‍, ലോകേഷ് കനകരാജ് എന്നിവര്‍ ഒരുക്കുന്ന ചിത്രങ്ങളാണ് രജനികാന്തിന്റെതായി വരാനുള്ളത്.