മകള്‍ അലംകൃതയെ തന്റെ ഒരു സിനിമ പോലും കാണിച്ചിട്ടില്ലെന്ന് പൃഥ്വിരാജ്. അതിനാല്‍ തന്നെ തന്റെ അഭിനയം എങ്ങനെയാണെന്ന് അവള്‍ക്ക് അറിയില്ല. അവള്‍ക്ക് വേണ്ടി ഒരു സിനിമ ഉണ്ടാക്കണം എന്ന് താന്‍ ആലോചിക്കുന്നുണ്ട് എന്നാണ് പൃഥ്വിരാജ് പറയുന്നത്. തന്റെ സിനിമകളില്‍ വയലന്‍സ് ഒക്കെ ഉള്ളതിനാലാണ് മകളെ കാണിക്കാത്തത് എന്നാണ് താരം പറയുന്നത്.
തന്റെ ഒരു സിനിമയും മോള്‍ കണ്ടിട്ടില്ല. താന്‍ ചെയ്യുന്ന സിനിമകളിലെല്ലാം കുറച്ച് വയലന്‍സൊക്കെ ഉള്ളതുകൊണ്ട് ഇതുവരെ കാണിച്ചിട്ടില്ല. ആലി കണ്ടിട്ടുള്ളതെല്ലാം കുട്ടികളുടെ സിനിമയാണ്. തന്റെ അഭിനയം എങ്ങനെയാണ് എന്നൊന്നും അവള്‍ക്കറിയില്ല. തന്റെ സിനിമകളെക്കുറിച്ചൊന്നും അഭിപ്രായം പറഞ്ഞിട്ടില്ല. കുട്ടികള്‍ക്ക് വേണ്ടിയൊരു സിനിമ ചെയ്യണമെന്നാണ് അവളിപ്പോള്‍ നിരന്തരമായി പറഞ്ഞു കൊണ്ടിരിക്കുന്നത്.
കുട്ടികളുടെ സിനിമ ഇപ്പോള്‍ കന്റെ ലിസ്റ്റിലുണ്ട്. ചോദ്യങ്ങള്‍ ചോദിക്കുന്നത് ഒരിക്കലും നിര്‍ത്തരുത്. അത്രയേറെ ചോദ്യങ്ങള്‍ ചോദിക്കാറുണ്ട് അവള്‍. ഇപ്പോഴത്തെ കുട്ടികള്‍ക്കെല്ലാമുള്ളതാണെന്ന് തോന്നുന്നു. തന്റെ സുഹൃത്തുക്കളുടെ മക്കളെക്കാള്‍ കൂടുതല്‍ ചോദ്യമാണ് ഇവള്‍ക്ക്. ഒരഞ്ച് മിനുട്ട് മിണ്ടാതിരിക്കാന്‍ പറ്റുമോയെന്ന് ചില സമയത്ത് ചിന്തിച്ച് പോയിട്ടുണ്ട്. ചോദ്യങ്ങള്‍ ചോദിച്ച് കൊണ്ടേയിരിക്കുന്ന ആളാണ്.
ആ പ്രായത്തിലുള്ള കുട്ടികളുടെ എനര്‍ജി അസൂയാവഹമാണ്. താന്‍ രാവിലെ വര്‍ക്കൗട്ടൊക്കെ കഴിഞ്ഞ് ഉച്ചയാവുമ്പോഴേ ക്ഷീണിക്കും. പിന്നെ അവളുടെ ഈ എനര്‍ജിയും ചോദ്യങ്ങള്‍ ചോദിക്കുന്നതും ജീവിതത്തില്‍ എപ്പോഴും നിലനില്‍ക്കട്ടെ എന്നാണ് താന്‍ ആഗ്രഹിക്കുന്നത് എന്നാണ് പൃഥ്വിരാജ് പറയുന്നത്.