ബോളിവുഡ് താരം വിദ്യാ ബാലനും താനും ബന്ധുക്കളാണെന്ന് വെളിപ്പെടുത്തി നടി പ്രിയാമണി. വിദ്യാ ബാലന്‍ ബോളിവുഡില്‍ സജീവ സാന്നിധ്യമാണെങ്കില്‍, തെന്നിന്ത്യയിലും ബോളിവുഡിലും ഒരു പോലെ തിളങ്ങുന്ന താരമാണ് പ്രിയാമണി. ഇരുവരും ബന്ധുക്കള്‍ ആണെങ്കിലും താരങ്ങള്‍ കണ്ടുമുട്ടുന്നത് അപൂര്‍വ്വമായാണ്.
രണ്ട് തവണ മാത്രമേ തമ്മില്‍ കണ്ടിട്ടുള്ളു എന്നാണ് പ്രിയാമണി ഇപ്പോള്‍ തുറന്നു പറഞ്ഞിരിക്കുന്നത്. അച്ഛന്റെ ബന്ധത്തിലുള്ള സെക്കന്റ് കസിന്‍ ആണ് വിദ്യാ ബാലന്‍. മുത്തച്ഛന്റെ മൂത്ത സഹോദരനാണ് വിദ്യാ ബാലന്റെ മുത്തച്ഛന്‍. ഇതുവരെ രണ്ട് തവണ മാത്രമാണ് വിദ്യയെ നേരിട്ടു കണ്ടത്.
വൈസാഗില്‍ നടന്ന ഒരു അവാര്‍ഡുദാന ചടങ്ങില്‍ സ്റ്റേജില്‍ വച്ചാണ് ഞങ്ങള്‍ ആദ്യമായി കണ്ടത്. വിദ്യ വളരെ സ്വീറ്റാണ്. പരസ്പരം വിശേഷം തിരക്കി ആലിംഗനം ചെയ്താണ് അന്ന് പിരിഞ്ഞത്. ഷാരൂഖ് ഖാന്‍ നടത്തിയ ഒരു പാര്‍ട്ടിയില്‍ വച്ചായിരുന്ന ഞങ്ങളുടെ രണ്ടാമത്തെ കണ്ടുമുട്ടല്‍. അത് ഷാരൂഖ് ഖാന്റെ ജന്മദിന പാര്‍ട്ടിയിലായിരുന്നു എന്നാണ് പ്രിയാമണി പറയുന്നത്.
അതേസമയം, തെലുങ്ക് സിനിമയിലൂടെ അരങ്ങേറ്റം കുറിച്ച പ്രിയാമണി, സത്യം എന്ന ചിത്രത്തിലൂടെ മലയാള സിനിമയില്‍ എത്തുന്നത്. ഷാരൂഖ് ഖാന്റെ ചെന്നൈ എക്‌സ്പ്രസ് ചിത്രത്തില്‍ ഒരു ഐറ്റം സോംഗ് അവതരിപ്പിച്ചു കൊണ്ടാണ് ബോളിവുഡില്‍ അരങ്ങേറ്റം കുറിച്ചത്. അതീത്, സാലം വെങ്കി, ജവാന്‍, ആര്‍ട്ടിക്കിള്‍ 370, മൈദാന്‍ എന്നീ ബോളിവുഡ് ചിത്രങ്ങളില്‍ പ്രിയാമണി അഭിനയിച്ചിട്ടുണ്ട്.
