പൃഥ്വിരാജും സുരാജ് വെഞ്ഞാറമൂടും കേന്ദ്ര കഥാപാത്രങ്ങളായെത്തിയ “ഡ്രൈവിങ് ലൈസന്‍സി”ന് തിയേറ്ററുകളില്‍ മികച്ച പ്രതികരണം നേടി മുന്നേറുകയാണ്. ചിത്രത്തെക്കുറിച്ച് വളരെ നല്ല അഭിപ്രായങ്ങളാണ് സോഷ്യല്‍ മീഡിയയില്‍ നിന്നടക്കം ലഭിക്കുന്നത്. ഇപ്പോഴിതാ ചിത്രത്തെ പ്രശംസിച്ച് രംഗത്ത് വന്നിരിക്കുകയാണ് നിര്‍മ്മാതാവ് ജോബി ജോര്‍ജ്. ആദ്യാവസാനം ഇത്രയും സന്തോഷത്തോടെ ഒരു സിനിമ താന്‍ കണ്ടിട്ടില്ലെന്ന് ജോബി ഫെയ്‌സ്ബുക്കില്‍ കുറിച്ചു.
“ഡ്രൈവിംഗ് ലൈസന്‍സ്……. അതിമനോഹരം, നല്ല രസമായി എടുത്തു വെച്ചിരിക്കുന്നു, കുടുംബം ഒന്നാകെ ഇ ക്രിസ്തുമസ് കാലത്തു പോയികാണാന്‍ പറ്റിയ സിനിമ… സുരാജ് തകര്‍ത്തിരിക്കുന്നു എവിടെയൊക്കെയോ കണ്ണ് നറഞ്ഞു.. ആദ്യാവസാനം ഇത്രയും സന്തോഷത്തോടെ ഒരു സിനിമ ഞാന്‍ കണ്ടിട്ടില്ല, ലാല്‍ ജൂനിയര്‍, ഇപ്പോഴാണ് നിങ്ങള്‍ ശെരിക്കും ലാല്‍ ജൂനിയര്‍ ആയത്, സച്ചി നിങ്ങളുടെ കഴിവ് എഴുതി അറിയിക്കാന്‍ പറ്റില്ല കാണുമ്പോള്‍ പറയാം.. പ്രിത്വിരാജ് good job brother നിങ്ങളെ ഞാന്‍ വര്‍ണിച്ചാല്‍ പിന്നെ അത് തള്ളല്‍ ആകും.. അത് വേണ്ടാ one word about movie സൂപ്പര്‍ ക്യാഷ് മുതലാകും.” ജോബി കുറിച്ചു.
സംവിധായകന്‍ ലാലിന്റെ മകന്‍ ജീന്‍ പോളാണ് ചിത്രം സംവിധാനം ചെയ്യുന്നത്. ലക്ഷ്വറി കാറുകളോട് ആഭിമുഖ്യമുള്ള സിനിമാതാരമായാണ് പൃഥ്വിരാജ് ചിത്രത്തിലെത്തുന്നത്. പൃഥിയുടെയും സുരാജിന്റെ കഥാപാത്രങ്ങള്‍ തമ്മിലുള്ള സംഘര്‍ഷങ്ങളാണ് ചിത്രത്തിന്റെ ആധാരം. ദീപ്തി സതി, മിയ ജോര്‍ജ് എന്നിവരാണ് നായികമാരായി എത്തുന്നത്. പൃഥിരാജിന്റെ ഭാര്യയായാണ് ദീപ്തി വേഷമിടുന്നത്. സച്ചി തിരക്കഥയൊരുക്കുന്ന ചിത്രത്തിന്റെ ഛായാഗ്രഹണം നിര്‍വ്വഹിക്കുന്നത് അലക്‌സ് ജെ പുളിക്കലാണ്. പൃഥിരാജ് പ്രൊഡക്ഷന്‍സിനൊപ്പം ലിസ്റ്റിന്‍ സ്റ്റീഫനും ചേര്‍ന്നാണ് ചിത്രം നിര്‍മ്മിക്കുന്നത്.