ഒരു മിനിറ്റ് പോലും പ്രേക്ഷകനെ ബോറടിപ്പിക്കാത്ത സിനിമയാകും ‘കിഷ്കിന്ധാ കാണ്ഡം’ എന്ന് നിര്‍മ്മാതാവ് ജോബി ജോര്‍ജ്. ആസിഫ് അലിയെ നായകനാക്കി ദിന്‍ജിത്ത് അയ്യത്താന്‍ സംവിധാനം ചെയ്യുന്ന ചിത്രമാണ് കിഷ്കിന്ധാ കാണ്ഡം. ഗുഡ്‌വില്‍ എന്റര്‍ടെയ്ന്‍മെന്റ്‌സിന്റെ ബാനറില്‍ ജോബി ജോര്‍ജ് ആണ് നിര്‍മ്മിക്കുന്നത്.
ഈ സിനിമ നിര്‍മ്മിക്കാനുണ്ടായ കാരണത്തെ കുറിച്ചാണ് ജോബി ജോര്‍ജ് ഇപ്പോള്‍ തുറന്നു പറഞ്ഞിരിക്കുന്നത്. ചിത്രത്തിന്റേത് വല്ലാത്തൊരു തിരക്കഥയാണ്. ഞാന്‍ പലതരം സിനിമകള്‍ ചെയ്തിട്ടുണ്ട്. ഞാന്‍ ചെയ്‌തൊരു നല്ല സിനിമയാണ് അബ്രഹാമിന്റെ സന്തതികള്‍. ആ ചിത്രം ജനങ്ങള്‍ ഏറ്റെടുത്തതുമാണ്. അതൊരു ബ്രില്ല്യന്റ് ചിത്രമായിരുന്നു.
അതുപോലെ തന്നെ കിഷ്കിന്ധാ കാണ്ഡവും ഒരു ബ്രില്ല്യന്റ് ചിത്രമാണ്. എനിക്ക് ഈ സിനിമ ഒരുപാട് ഇഷ്ടപ്പെട്ടു. മലയാള സിനിമ ചരിത്രത്തിലെ നല്ല സിനിമകളുടെ ലിസ്റ്റില്‍ കിഷ്കിന്ധാ കാണ്ഡം ഉണ്ടാകും. ഒരു മിസ്റ്ററി ത്രില്ലറാണ് ചിത്രം. ഇതുപോലൊരു ചിത്രം മലയാളത്തില്‍ വന്നിട്ടില്ലെന്ന് എനിക്ക് പറയാനാകില്ല, കാരണം എന്റെ അറിവ് പരിമിതമാണ്.
ഈ ഴോണറിലുള്ള ചിത്രം ഞാന്‍ കണ്ടിട്ടില്ല. ഒരുപാട് ചിത്രങ്ങള്‍ കണ്ടിട്ടുള്ള എന്റെ മകനും പറഞ്ഞു ഇത്തരമൊരു ചിത്രം കണ്ടിട്ടില്ലെന്ന്. പ്രേക്ഷകര്‍ എങ്ങനെ സ്വീകരിക്കുന്നു എന്നതിലാണ് ഒരു സിനിമയുടെ വിജയമിരിക്കുന്നത്. ഒരു കാര്യം എനിക്ക് പറയാനാകും.
ഈ സിനിമ ഒരുമിനിറ്റ് പോലും പ്രേക്ഷകനെ ബോറടിപ്പിക്കില്ല എന്നാണ് ജോബി ജോര്‍ജ് മാതൃഭൂമി ഡോട്ട്‌കോമിനോട് പ്രതികരിച്ചിരിക്കുന്നത്. അതേസമയം, വിജയരാഘവന്‍, അപര്‍ണ ബാലമുരളി എന്നിവരാണ് ചിത്രത്തില്‍ മറ്റ് പ്രധാന വേഷങ്ങളില്‍ എത്തുന്നത്. ഓണം റിലീസായി സെപ്റ്റംബര്‍ 12ന് തിയറ്ററുകളിലെത്തും.