മലയാള സിനിമയില്‍ കോളിളക്കം സൃഷ്ടിച്ച ഹേമ കമ്മിറ്റി റിപ്പോര്‍ട്ടിനെ കുറിച്ച് തനിക്ക് അറിയില്ലെന്ന് പ്രതികരിച്ച് രജനികാന്ത്. തമിഴ് സിനിമയിലും ഹേമ കമ്മിറ്റി മാതൃകയില്‍ സമിതി വേണോ എന്ന ചോദ്യത്തിന് തനിക്ക് അറിയില്ല, ക്ഷമിക്കണം എന്നായിരുന്നു രജനികാന്തിന്റെ പ്രതികരണം.
തമിഴ് സിനിമയിലും ഹേമ കമ്മിറ്റിയെ പോലെ അന്വേഷണം നടത്തണമെന്ന് ആവശ്യം ഉയരുന്ന പശ്ചാത്തലത്തില്‍ കൂടിയാണ് രജനിയുടെ പ്രതികരണം. ഇതിനെതിരെ വിമര്‍ശനങ്ങളും ഉയരുന്നുണ്ട്. അതേസമയം, തമിഴിലും സമാനമായ കമ്മിറ്റി രൂപീകരിക്കുമെന്നാണ് നടനും നടികര്‍ സംഘത്തിന്റെ ജനറല്‍ സെക്രട്ടറിയുമായ വിശാല്‍ പ്രതികരിച്ചത്.
വനിതാ താരങ്ങളെ സഹായിക്കാനും അവര്‍ക്ക് പരാതി നല്‍കാനുമായി തമിഴ് താരങ്ങളുടെ സംഘടനയായ നടികര്‍ സംഘം പരാതി പരിഹാര ഫോറം രൂപീകരിക്കുമെന്ന് വിശാല്‍ വ്യക്തമാക്കിയിരുന്നു. സിനിമയില്‍ മാത്രമല്ല, എല്ലാ മേഖലയിലും ഇത്തരം സംഭവങ്ങള്‍ നടക്കുന്നുണ്ട്.
സ്ത്രീ പീഡനം ഇപ്പോള്‍ ഒരു സാധാരണ സംഭവമായി മാറിയിരിക്കുകയാണ്. പലതരം മോശം സാഹചര്യങ്ങളിലൂടെയാണ് പെണ്‍കുട്ടികളും സ്ത്രീകളുമെല്ലാം കടന്നുപോകുന്നത്. എല്ലാവരും അതു പരസ്യമായി പറയില്ല. ഹേമ കമ്മിറ്റി റിപ്പോര്‍ട്ടിലും ഇത്തരം പരാതികളിലും ആവശ്യമായ നടപടികള്‍ സ്വീകരിക്കണമെന്നും വിശാല്‍ ആവശ്യപ്പെട്ടിരുന്നു.