ചിരഞ്ജീവിയുടെ വാള്‍ട്ടയര്‍ വീരയ്യ മികച്ച പ്രതികരണം നേടി മുന്നേറുകയാണ്. ഒരിടവേളയ്ക്ക് ചിരഞ്ജീവിയെ ഇരു കൈകളും നീട്ടി സ്വീകരിച്ചിരിക്കുകയാണ് ആരാധകര്‍. വാള്‍ട്ടയര്‍ വീരയ്യയുടെ വിജയാഘോഷത്തിനിടയില്‍ നടന്റെ വിമര്‍ശകര്‍ക്ക് മറുപടി നല്‍കിയിരിക്കുകയാണ് മകനും നടനുമായ രാംചരണ്‍ തേജ.
അടുത്തിടെ മെഗസ്റ്റാറിനെക്കുറിച്ച് മോശമായ അഭിപ്രായം നടത്തിയ നടിയും രാഷ്ട്രീയ പ്രവര്‍ത്തകയുമായ റോജയ്ക്കുള്ള പരോക്ഷമറുപടിയാണ് രാം ചരണ്‍ നല്‍കിയത്. ചിരഞ്ജീവി വളരെ ശാന്തനും നിശബ്ദനുമായ ഒരു വ്യക്തിയാണെന്നും എന്നാല്‍ അദ്ദേഹത്തിന്റെ ആരാധകര്‍ അത്തരത്തിലുള്ളവരല്ലെന്നും രാം ചരണ്‍ പറഞ്ഞു.
‘ഭോലാ ശങ്കര്‍’ എന്ന ചിത്രത്തിലും ചിരഞ്ജീവി നായകനാകുന്നുണ്ട്. മെഹര്‍ രമേഷാണ് ചിത്രത്തിന്റെ സംവിധാനം. ‘ഷാഡോ’ എന്ന ചിത്രത്തിന് ശേഷം മെഹര്‍ രമേഷിന്റെ സംവിധാനത്തിലുള്ളതാണ് ‘ഭോലാ ശങ്കര്‍’. അജിത്ത് നായകനായ ഹിറ്റ് ചിത്രം ‘വേതാള’ത്തിന്റെ റീമേക്കാണ് മാര്‍ത്താണ്ഡ് കെ വെങ്കടേഷ് ചിത്രസംയോജനം നിര്‍വഹിക്കുന്ന ‘ഭോലാ ശങ്കര്‍’. രമബ്രഹ്‌മം സുങ്കരയാണ് ചിത്രം നിര്‍മിക്കുന്നത്.
‘ഭോലാ ശങ്കറെ’ന്ന ചിത്രത്തിന്റെ ഛായാഗ്രാഹണം ഡുഡ്‌ലി ആണ് നിര്‍വഹിക്കുന്നത് . ‘വേതാളം’ എന്ന ചിത്രത്തില്‍ അജിത്ത് അഭിനയിച്ച കഥാപാത്രമായിട്ടാണ് ‘ഭോലാ ശങ്കറി’ല്‍ ചിരഞ്ജീവി എത്തുക. ചിരഞ്ജീവിയുടെ സഹോദരിയായി ചിത്രത്തില്‍ കീര്‍ത്തി സുരേഷ് അഭിനയിക്കുന്നു. തമന്ന, മുരളി ശര്‍മ, രഘു ബാബു, റാവു രമേഷ്, വെന്നെല കിഷോര്‍ തുടങ്ങിയവരും ചിത്രത്തില്‍ വേഷമിടുന്നു. മഹതി സ്വര സാഗറാണ് ചിത്രത്തിന്റെ സംഗീത സംവിധാനം.
