ഏറെ വിവാദമായ സിനിമ ആണെങ്കിലും ബോളിവുഡിലെ കഴിഞ്ഞ വര്‍ഷത്തെ പണംവാരി പടമായിരുന്നു ‘അനിമല്‍’. രണ്‍ബിര്‍ കപൂറിന്റെ കരിയറിലെ സൂപ്പര്‍ ഹിറ്റ് ആയ ചിത്രം ബോളിവുഡില്‍ രശ്മിക മന്ദാനയ്ക്കും ബ്രേക്ക് നല്‍കിയിരിക്കുകയാണ്. എന്നാല്‍ ചിത്രത്തിന്റെ വിജയാഘോഷങ്ങളില്‍ രശ്മിക മന്ദാന എത്തിയിരുന്നില്ല.
എന്നാല്‍ സക്‌സസ് പാര്‍ട്ടികള്‍ രശ്മിക വേണ്ടെന്ന് വച്ചതല്ല. ഇതിന്റെ കാരണമാണ് നടി ഇപ്പോള്‍ വ്യക്തമാക്കിയിരിക്കുന്നത്. ”വലിയൊരു സിനിമ ചെയ്തു. അത് ജനം കണ്ട് മികച്ച അഭിപ്രായങ്ങള്‍ പറഞ്ഞു അത് വലിയ ഹിറ്റായി. എല്ലാവരും ആ സമയത്ത് ആഗ്രഹിക്കുന്നതു പോലെ ആ വിജയം ആസ്വദിക്കാന്‍ കുറച്ച് സമയം മാറ്റിവയ്ക്കാന്‍ എനിക്കും ആഗ്രഹം ഉണ്ടായിരുന്നു.”
”പക്ഷേ വര്‍ക്ക്‌ഹോളിക് ആയിരുന്ന എനിക്ക് അനിമല്‍ റിലീസ് ചെയ്ത് പിറ്റേ ദിവസം മുതല്‍ പുതിയ ചിത്രത്തിന്റെ സെറ്റില്‍ എത്തണമായിരുന്നു. അതിനാല്‍ ഞാന്‍ ധാരാളം അഭിമുഖങ്ങളിലോ പ്രമോഷന്‍ പരിപാടികളിലോ പങ്കെടുത്തില്ല. എനിക്ക് ജോലി ചെയ്യാനായി വലിയ യാത്രകള്‍ ചെയ്യണം.”
”എന്റെ കരിയറിലെ ഏറ്റവും വലിയ ചില സിനിമകളുടെ ചിത്രീകരണത്തിലാണ് ഞാന്‍. നിങ്ങള്‍ക്കറിയാവുന്നതു പോലെ എന്റെ സിനിമകളിലെ ലുക്കുകള്‍ വെളിപ്പെടുത്താന്‍ കഴിയില്ല. അതിനാല്‍ എനിക്ക് ഫോട്ടോകള്‍ എടുക്കാനോ ചില പോസ്റ്റുകള്‍ പോസ്റ്റുചെയ്യാനോ നിങ്ങള്‍ ആരാധകരുടെ ഇഷ്ടത്തിനനുസരിച്ച് ലൈവ് ചെയ്യാനോ കഴിയില്ല.”
”ആരാധകര് കാണിക്കുന്ന സ്‌നേഹം കാണുന്നുണ്ടെന്നും രശ്മിക പറഞ്ഞു. തന്റെ വരാനിരിക്കുന്ന പ്രോജക്ടുകളുടെ ഷൂട്ടിംഗ് നന്നായി നടക്കുന്നുണ്ട്” എന്നാണ് രശ്മിക മന്ദാന സോഷ്യല്‍ മീഡിയ ക്യൂ ആന്റ് എ സെഷനില്‍ വ്യക്തമാക്കിയിരിക്കുന്നത്.