മോഹന്‍ലാല്‍-ലിജോ ജോസ് പെല്ലിശേരി കോംമ്പോയില്‍ എത്തുന്നു ‘മലൈകോട്ടൈ വാലിബന്‍’ സിനിമയില്‍ ‘കാന്താര’ നായകന്‍ ഋഷഭ് ഷെട്ടിയും ഉണ്ടാവുമെന്ന വാര്‍ത്തകള്‍ കഴിഞ്ഞ ദിവസം എത്തിയിരുന്നു. മലൈകോട്ടൈ വാലിബനിലൂടെ ഋഷഭ് മലയാളത്തിലേക്ക് അരങ്ങേറ്റം കുറിക്കുന്നുവെന്ന റിപ്പോര്‍ട്ടുകളായിരുന്നു എത്തിയിരുന്നത്.
ഇക്കാര്യത്തില്‍ വ്യക്തത വരുത്തിയിരിക്കുകയാണ് ഋഷഭ് ഷെട്ടി ഇപ്പോള്‍. ലിജോയുടെ സിനിമയില്‍ അഭിനയിക്കുന്നതിന് വേണ്ടി തന്നെ ക്ഷണിച്ചിരുന്നു. എന്നാല്‍ മറ്റൊരു കന്നഡ ചിത്രത്തില്‍ അഭിനയിക്കാനുള്ളതിനാല്‍ ഈ ഓഫര്‍ നിരസിക്കേണ്ടി വന്നു എന്നാണ് ഋഷഭ് ഷെട്ടി ഒരു മാധ്യമത്തോട് പ്രതികരിച്ചിരിക്കുന്നത്.
അതേസമയം, ചിത്രത്തിന്റെ ഷൂട്ടിംഗ് രാജസ്ഥാനില്‍ പുരോഗമിക്കുകയാണ്. ജനുവരി 18ന് ആയിരുന്നു ചിത്രത്തിന്റെ ഷൂട്ടിംഗ് രാജസ്ഥാനിലെ ജയ്‌സാല്‍മീറില്‍ ആരംഭിച്ചത്. കമല്‍ ഹാസന്‍ ചിത്രത്തിന്റെ ഭാഗമായേക്കും എന്നും റിപ്പോര്‍ട്ടുകളുണ്ട്. മോഹന്‍ലാല്‍ ഗുസ്തിക്കാരനായാണ് മലൈകോട്ടൈ വാലിബനില്‍ വേഷമിടുക എന്നാണ് റിപ്പോര്‍ട്ടുകള്‍.
പിരീഡ് ഡ്രാമ ആയാണ് ചിത്രം ഒരുങ്ങുന്നതെന്നും റിപ്പോര്‍ട്ടുകളുണ്ട്. സൊണാലി കുല്‍ക്കര്‍ണി, ഹരീഷ് പേരടി, ഡാനിഷ് സെയ്ത് എന്നിവരാണ് ചിത്രത്തിലെ മറ്റ് അഭിനേതാക്കള്‍. ജോണ്‍ മേരി ക്രിയേറ്റിവ് ലിമിറ്റഡിനോടൊപ്പം മാക്‌സ് ലാബ് സിനിമാസ്, ആമേന്‍ മൂവി മോണാസ്റ്ററി, സെഞ്ച്വറി ഫിലിംസ് എന്നിവര്‍ ചേര്‍ന്നാണ് ഈ ചിത്രം നിര്‍മ്മിക്കുന്നത്.