റീച്ച് കൂട്ടാനായി തന്റെ ചിത്രങ്ങള്‍ പലരും ഉപയോഗിക്കാറുണ്ടെന്ന് നടി സാധിക വേണുഗോപാല്‍. മസാജിങ് സെന്ററുകളുടെ കവര്‍ ആയി പോലും തന്റെ ചിത്രങ്ങള്‍ ഉപയോഗിക്കുന്നുണ്ട് എന്നാണ് സാധിക തുറന്നു പറഞ്ഞിരിക്കുന്നത്. പലരും ഇങ്ങനെയുള്ള ചിത്രങ്ങള്‍ എനിക്ക് അയച്ച് തന്നിട്ടുണ്ടെന്നും സാധിക പറയുന്നുണ്ട്.
പല ടൈറ്റിലുകള്‍ കൊടുത്ത് പേജുകളില്‍ എന്റെ ഫോട്ടോ പ്രചരിക്കുന്നത് ഞാന്‍ കാണാറുണ്ട്. അത് മാത്രമല്ല ദുബായിലൊക്കെ കുറേ മസാജിങ് സെന്ററിന്റെ കവര്‍ തന്നെ എന്റെ ഫോട്ടോകളാണ്. അത് എടുത്ത് അവിടെ നിന്ന് ആളുകള്‍ എനിക്ക് അയച്ച് തരാറുണ്ട്. അവിടെ പോയാല്‍ കാണാന്‍ പറ്റുമോ എന്നൊക്കെ ചിലര്‍ ചോദിക്കാറുമുണ്ട്.
പോയി നോക്കാന്‍ ഞാനും മറുപടിയായി പറയും. നമ്മള്‍ കാണില്ലെന്നുള്ള വിശ്വാസത്തിലാകും ഫോട്ടോകള്‍ ഇത്തരത്തില്‍ ഉപയോഗിക്കുന്നത്. നമ്മള്‍ മലയാളികള്‍ ഇല്ലാത്ത നാടില്ലല്ലോ. അതുകൊണ്ട് ആരെങ്കിലും എവിടെ നിന്നെങ്കിലും കാണുമ്പോള്‍ ഫോട്ടോ എടുത്ത് അയച്ച് തരും.
മോശമായിട്ടുള്ള ക്യാപ്ഷനും തമ്പ് നെയിലിനും വേണ്ടി എന്റെ ഫോട്ടോകള്‍ ഉപയോഗിക്കുന്നത് കാണുമ്പോള്‍ ആദ്യം വിഷമം വരുമായിരുന്നു. എന്തിനാണ് ഇങ്ങനെ ചെയ്യുന്നത് എന്നൊക്കെ തോന്നുമായിരുന്നു. ഇപ്പോള്‍ എനിക്ക് അങ്ങനെ തോന്നാറില്ല. കാരണം അവരുടെ വീട്ടിലേക്ക് അരി വാങ്ങിക്കാന്‍ ഞാന്‍ ഒരു കാരണമായി എന്ന് വിശ്വസിക്കും.
ഇപ്പോള്‍ ഞാന്‍ ഒന്നിനോടും റിയാക്ട് ചെയ്യാന്‍ പോകാറില്ല എന്നാണ് ഒരു യൂട്യൂബ് ചാനലിന് നല്‍കിയ അഭിമുഖത്തില്‍ സാധിക പറയുന്നത്. അതേസമയം, നിലവില്‍ സീരിയല്‍ രംഗത്ത് സജീവമാണ് സാധിക. മായാമയൂരം എന്ന സീരിയലിലാണ് സാധിക ഇപ്പോള്‍ അഭിനയിക്കുന്നത്.