രോമാഞ്ചം എന്ന സൂപ്പർ ഹിറ്റ് ചിത്രത്തിന് ശേഷം ജിതു മാധവൻ സംവിധാനം ചെയ്ത് ഫഹദ് ഫാസിൽ നായകനായെത്തിയ ‘ആവേശം’ മികച്ച പ്രേക്ഷക പ്രതികരണങ്ങളോടെ മുന്നേറുകയാണ്. ഫഹദിന്റെ അഭിനയ ജീവിതത്തിലെ ഏറ്റവും മികച്ച കഥാപാത്രം കൂടിയാണ് ആവേശത്തിലെ രംഗ.
ബംഗളുരുവിലെ ഒരു കോളേജ് പശ്ചാത്തലത്തിലുള്ള 3 മലയാളി വിദ്യാർത്ഥികളുടെ കഥയും ശേഷം അവർ നേരിടുന്ന ചില പ്രശ്നങ്ങൾക്ക് രംഗ എന്ന ലോക്കൽ ഗുണ്ടാ നേതാവിന്റെ സഹായം തേടുന്നതും തുടർന്നുള്ള രസകരമായ സംഭവ വികാസങ്ങൾ ബ്ലാക്ക് ഹ്യൂമറിന്റെയും ഗ്യാങ്ങ്സ്റ്റർ സ്പൂഫിന്റെയും പശ്ചാത്തലത്തിൽ പറയുന്നതുമാണ് ആവേശത്തിന്റെ പ്രമേയം.
ഫഹദിന്റെ കഥാപാത്രത്തോടൊപ്പം സിനിമയിൽ ഏറ്റവും കൂടുതൽ കൈയടി നേടിയതാരമായിരുന്നു സജിൻ ഗോപു അവതരിപ്പിച്ച അമ്പാൻ എന്ന കഥാപാത്രം. രംഗയുടെ വലംകൈയായി സദാസമയം കൂടെ നിൽക്കുന്ന അമ്പാൻ ആവേശത്തിലെ ഏറ്റവും കൂടുതൽ ചർച്ച ചെയ്യപ്പെട്ട കഥാപാത്രം കൂടിയായിരുന്നു. ഇപ്പോഴിതാ അമ്പാന്റെ കഥാപാത്രത്തിന് വേണ്ടി കോസ്റ്റ്യൂം തിരഞ്ഞെടുത്തത്തിനെ പറ്റി സംസാരിക്കുകയാണ് സജിൻ ഗോപു. ഒരു പ്രശസ്ത കോമിക് കഥാപാത്രത്തിന്റെ റഫറൻസ് ആയിരുന്നു അമ്പാന്റെ കോസ്റ്റ്യൂം എന്നാണ് സജിൻ ഗോപു പറയുന്നത്.
“അത് ശരിക്കും പറഞ്ഞാൽ ജിത്തുവിൻ്റെ ഐഡിയയാണ്. അമ്പാനെപ്പറ്റി എന്നോട് പറഞ്ഞപ്പോൾ ആ ക്യാരക്‌ടറിൻ്റെ കോസ്റ്റ്യൂമിനെപ്പറ്റിയും പറഞ്ഞിരുന്നു. ബാലരമയിലെ വിക്രമൻ എന്ന കോമിക് കഥാപാത്രം ഇടുന്ന പോലെ വരകളുള്ള ടീ ഷർട്ടാണ് അമ്പാൻ്റെ വേഷം എന്ന പറഞ്ഞുവെച്ചു. ആ കഥാപാത്രത്തിന് ഒരു കോമിക് ടച്ച് കിട്ടാൻ അത് ഹെല്പ് ചെയ്യുമെന്നും ജിതു പറഞ്ഞു.
ഞാൻ ആ കോസ്റ്റ്യൂം ഇട്ട് വന്നപ്പോൾ നമ്മൾ ബാലരമയിൽ വായിക്കുന്ന വിക്രമന്റെ അതേ ഗെറ്റപ്പുണ്ടന്ന് തോന്നി. സിനിമ കണ്ട പലരും അത് എടുത്തു പറഞ്ഞു. അതൊക്കെ ആളുകൾക്ക് മനസിലായി എന്ന് അറിയുമ്പോൾ സന്തോഷം.” എന്നാണ് ക്ലബ്ബ് എഫ്എമ്മിന് നൽകിയ അഭിമുഖത്തിൽ സജിൻ ഗോപു പറഞ്ഞത്.
അൻവർ റഷീദ് എന്റർടൈൻമെന്റ്സ്, ഫഹദ് ഫാസിൽ ആൻഡ് ഫ്രണ്ട്സിന്റെ ബാനറിൽ അൻവർ റഷീദ്, നസ്രിയ നസിം എന്നിവർ ചേർന്നാണ് ചിത്രം നിർമിക്കുന്നത്. ജിതു മാധവൻ തന്നെയാണ് ചിത്രത്തിന് തിരക്കഥ രചിച്ചിരിക്കുന്നത്.
മൻസൂർ അലി ഖാൻ, ആശിഷ് വിദ്യാർഥി, സജിൻ ഗോപു, പ്രണവ് രാജ്, ഹിപ്സ്റ്റർ, മിഥുൻ ജെ.എസ്, റോഷൻ ഷാനവാസ്, ശ്രീജിത്ത് നായർ, പൂജ മോഹൻരാജ്, നീരജ രാജേന്ദ്രൻ, തങ്കം മോഹൻ എന്നിവരാണ് ചിത്രത്തിലെ അഭിനേതാക്കൾ.