പിതാവ് ജോസഫ് പ്രഭുവിന്റെ അപ്രതീക്ഷിത വിയോഗത്തില്‍ മനംനൊന്ത് സാമന്ത. പിതാവിന്റെ മരണ വിവരം തന്റെ ഇന്‍സ്റ്റഗ്രാം അക്കൗണ്ടിലൂടെയാണ് സാമന്ത അറിയിച്ചത്. ‘അച്ഛാ, നമ്മള്‍ വീണ്ടും കണ്ടുമുട്ടും’ എന്നാണ് സാമന്ത ഇന്‍സ്റ്റഗ്രാം സ്റ്റോറിയില്‍ കുറിച്ചത്. സ്വകാര്യത മാനിക്കണമെന്ന് ആവശ്യപ്പെട്ട് സാമന്തയുടെ വക്താവും രംഗത്തെത്തിയിട്ടുണ്ട്.
പിതാവിന്റെ വിയോഗത്തില്‍, സാമന്തയും കുടുംബവും ഏറെ ദുഖകരമായ അവസ്ഥയിലൂടെയാണ് കടന്നുപോകുന്നത്. ഈ അവസരത്തില്‍ ആരാധകരും മാധ്യമങ്ങളും താരത്തിന്റെയും കുടുംബത്തിന്റെയും സ്വകാര്യത മാനിക്കണമെന്ന് അഭ്യര്‍ത്ഥിക്കുന്നതായി സാമന്തയുടെ വക്താവ് അറിയിച്ചു.
ജോസഫ് പ്രഭുവിന്റെയും നിനെറ്റ് പ്രഭുവിന്റെയും മകളായി ചെന്നൈയില്‍ ജനിച്ച സാമന്ത, തന്റെ വളര്‍ച്ചയില്‍ കുടുംബം വഹിച്ച പങ്ക് പലപ്പോഴും ആരാധകരുമായി പങ്കുവച്ചിട്ടുണ്ട്. തന്റെ കരിയറില്‍ കുടുംബ നല്‍കിയ പിന്തുണയും താരപദവിയിലേക്കുള്ള യാത്രയില്‍ അത് എങ്ങനെ സഹായിച്ചു എന്നതിനെ കുറിച്ചും താരം തുറന്നു പറഞ്ഞിട്ടുണ്ട്.
2022ല്‍ സാമന്തയുടെയും നാഗചൈതന്യയുടെയും വിവാഹത്തില്‍ നിന്നുള്ള ചിത്രങ്ങള്‍ ജോസഫ് പങ്കിട്ടിരുന്നു. ഈ ദമ്പതികള്‍ വേര്‍പിരിഞ്ഞ് ഒരു വര്‍ഷത്തിന് ശേഷമായിരുന്നു ഇത്. ‘പണ്ട് ഒരു കഥ ഉണ്ടായിരുന്നു. അത് ഇനി നിലവിലില്ല, അതിനാല്‍, നമുക്ക് ഒരു പുതിയ കഥ ആരംഭിക്കാം. ഒരു പുതിയ അധ്യായവും’ എന്നാണ് ഈ ചിത്രങ്ങള്‍ക്കൊപ്പം ജോസഫ് എഴുതിയത്.