വിവാഹമോചനത്തിന് ശേഷം താന്‍ നേരിടേണ്ടി വന്ന അധിക്ഷേപങ്ങളെ കുറിച്ച് പറഞ്ഞ് നടി സാമന്ത. തന്നെ ‘സെക്കന്‍ഡ് ഹാന്‍ഡ്’ എന്ന് ലേബല്‍ ചെയ്യപ്പെട്ടതിനെ കുറിച്ചാണ് സാമന്ത സംസാരിച്ചത്. അടുത്തിടെ നടന്ന ഒരു അഭിമുഖത്തിലാണ് ഇന്ത്യന്‍ സമൂഹത്തില്‍ വ്യാപിച്ചു കിടക്കുന്ന ആഴത്തിലുള്ള പുരുഷാധിപത്യത്തെയും ലൈംഗികതയെയും സാമന്ത സംസാരിച്ചത്.

ഒരു സ്ത്രീ വിവാഹമോചനത്തിലൂടെ കടന്നുപോകുമ്പോള്‍, വളരെയധികം നാണക്കേടും അപമാനവും അഭിമുഖീകരിക്കേണ്ടി വരുന്നു. ‘സെക്കന്‍ഡ് ഹാന്‍ഡ്, ‘യൂസ്ഡ്’, ‘പാഴായ ജീവിതം’ എന്നിങ്ങനെ ഒരുപാട് കമന്റുകള്‍ എനിക്ക് കിട്ടാറുണ്ട്. നിങ്ങള്‍ ഒരു കോണിലേക്ക് തള്ളപ്പെടുകയാണ്, അവിടെ നിങ്ങള്‍ ഒരു കാലത്ത് വിവാഹിതയായിരുന്നു.

നിങ്ങള്‍ ഒരു പരാജയമാണെന്നൊക്കെ നിങ്ങളെ കൊണ്ട് തോന്നിപ്പിക്കും. അതിലൂടെ കടന്നുപോയ ഓരോ പെണ്‍കുട്ടിയ്ക്കും ഇതു വളരെ ബുദ്ധിമുട്ടായിരിക്കുമെന്ന് ഞാന്‍ വിശ്വസിക്കുന്നു. എന്നാല്‍ ഞാന്‍ ഇപ്പോള്‍ വളരെ സന്തോഷവതിയാണ്. ഞാന്‍ വളരെയധികം വളര്‍ന്നു, ഞാന്‍ അവിശ്വസനീയമായ രീതിയില്‍ ജോലി ചെയ്യുന്നു.

എന്റെ ജീവിതത്തിലെ അടുത്ത ഘട്ടത്തിനായി ഞാന്‍ കാത്തിരിക്കുകയാണ്. പലരും തീര്‍ത്തും അസത്യമായ പല കാര്യങ്ങളും എന്നെ കുറിച്ച് പറഞ്ഞു. ‘ഇതൊന്നും ശരിയല്ല, ഞാന്‍ സത്യം പറയട്ടെ’ എന്ന് പറയാന്‍ ഒരുപാട് പ്രലോഭനങ്ങള്‍ ഉണ്ടായിട്ടുണ്ട്. വൃത്തികെട്ട കഥകളും പരമമായ നുണകളും പ്രചരിപ്പിക്കപ്പെട്ടപ്പോള്‍ സത്യം വിളിച്ചു പറയാന്‍ ശ്രമിച്ചിരരുന്നു.

എന്നെ പിന്തിരിപ്പിച്ചത് ഞാന്‍ എന്നോട് തന്നെ നടത്തിയ ആത്മഭാഷണങ്ങളാണ് എന്നാണ് സാമന്ത പറയുന്നത്. അതേസമയം, വര്‍ഷങ്ങള്‍ നീണ്ട പ്രണയത്തിന് ശേഷം 2017ലാണ് സാമന്തയും ചൈതന്യയും വിവാഹിതരാവുന്നത്. 2021ലാണ് ഇരുവരും വേര്‍പിരിഞ്ഞത്. ഈ ഡിസംബറിലാണ് ശോഭിതയും ചൈതന്യയും വിവാഹിതരാകാന്‍ പോകുന്നത്.