‘കടുവ’, ‘കാപ്പ’ എന്നീ രണ്ട് സിനിമകള്‍ ഒരുക്കി ഗംഭീര തിരിച്ചു വരവ് തന്നെയാണ് ഷാജി കൈലാസ് നടത്തിയിരിക്കുന്നത്. തിയേറ്ററില്‍ വന്‍ വിജയമായ ഈ ചിത്രങ്ങള്‍ക്ക് ശേഷം ഇനി ഷാജി കൈലാസിന്റെതായി റിലീസിന് ഒരുങ്ങുന്നത് മോഹന്‍ലാലിനെ നായകനാക്കി ഒരുക്കിയ ‘എലോണ്‍’ ആണ്.
ഇതിന് ശേഷവും നിരവധി ബിഗ് ബജറ്റ് സിനിമകളാണ് ഷാജി കൈലാസിന്റെ സംവിധാനത്തില്‍ ഒരുങ്ങാന്‍ പോകുന്നത്. വമ്പന്‍ പടങ്ങള്‍ ഇനിയും ചെയ്യും എന്നാണ് സംവിധായകന്‍ പറയുന്നത്. ആശീര്‍വാദ് സിനിമാസിന്റെ ബാനറില്‍ മോഹന്‍ലാല്‍ നായകനാകുന്ന പുതിയ സിനിമയുടെ തിരക്കഥ തയാറായി കൊണ്ടിരിക്കുന്നു.
മമ്മൂട്ടിക്ക് ആണെങ്കില്‍ പ്രത്യേക പാറ്റേണിലുള്ള വ്യത്യസ്ത സിനിമയാണ് വേണ്ടത്. അദ്ദേഹത്തിന് പറ്റിയ വിഷയം ലഭിച്ചാല്‍ എടുക്കും. പൃഥ്വിരാജിനെ നായകനാക്കി തുടര്‍ച്ചയായി രണ്ടു സിനിമകള്‍ എടുത്ത സാഹചര്യത്തില്‍ ഇനി ഉടനെ ഇല്ല. ഒരു വര്‍ഷം എങ്കിലും കഴിഞ്ഞേ ഇനി ആലോചിക്കുന്നുള്ളൂ.
ഹോംവര്‍ക്ക് ചെയ്ത ശേഷം സിനിമ എടുക്കുന്ന രീതി തനിക്കില്ല. ആവശ്യപ്പെടുന്ന സ്ഥലം ചിത്രീകരണത്തിന് ലഭിച്ചില്ലെങ്കില്‍ കിട്ടുന്ന സ്ഥലം കൊണ്ട് അഡ്ജസ്റ്റ് ചെയ്യുന്നയാളാണ് താന്‍. അതു കൊണ്ടു തന്നെ സ്വയം മാറാന്‍ എളുപ്പമാണ്. ഇല്ലെങ്കില്‍ വീട്ടില്‍ ഇരിക്കേണ്ടി വരും എന്നാണ് ഷാജി കൈലാസ് മനോരമ ഓണ്‍ലൈന് നല്‍കിയ അഭിമുഖത്തില്‍ പറയുന്നത്.
അതേസമയം, ജനുവരി 26ന് ആണ് എലോണ്‍ സിനിമ റിലീസ് ചെയ്യാനിരിക്കുന്നത്. മോഹന്‍ലാല്‍ മാത്രമാണ് ചിത്രത്തിലെ ഏക കഥാപാത്രം. ഇതിനൊപ്പം പൃഥ്വിരാജ്, സിദ്ദിഖ്, മഞ്ജു വാര്യര്‍, നന്ദു, രഞ്ജി പണിക്കര്‍, സീനത്ത് എന്നീ താരങ്ങള്‍ ശബ്ദ സാന്നിധ്യവുമായി എത്തുന്നുണ്ട്.