ഇക്കഴിഞ്ഞ ജൂണ്‍ മാസത്തിലാണ് താന്‍ വിവാഹിതയാകാന്‍ പോവുന്ന വിവരം നടി ഷംന കാസിം പങ്കുവച്ചത്. ജെബിഎസ് ഗ്രൂപ്പ് ഫൗണ്ടറും ചെയര്‍മാനുമായ ഷാനിദ് ആണ് വരന്‍. വിവാഹ നിശ്ചയത്തിന്റെ ഫോട്ടോയും നടി പങ്കുവച്ചിരുന്നു. എന്നാല്‍ തങ്ങള്‍ക്ക് പ്രേമിച്ച് നടക്കാന്‍ സമയം കിട്ടിയിട്ടില്ല എന്നാണ് ഷംന ഇപ്പോള്‍ പറയുന്നത്.
ദുബായില്‍ നടന്ന മര്‍ഹബ എന്ന പരിപാടിയിലാണ് ഷാനിദും ഷംനയും ആദ്യമായി കണ്ടുമുട്ടുന്നത്. പരസ്പരം സംസാരിച്ചപ്പോള്‍ തനിക്ക് ഇഷ്ടം തോന്നിയിരുന്നു. ഇക്കയ്ക്കും അങ്ങനെ തന്നെയെന്ന് പറഞ്ഞതോടെ വീട്ടില്‍ കാര്യം അവതരിപ്പിച്ചു. അങ്ങനെ വീട്ടുകാര്‍ പരസ്പരം സംസാരിച്ചു. എല്ലാവര്‍ക്കും ഇഷ്ടമായി.
ഒരു മാസത്തിനുള്ളില്‍ നിക്കാഹ് നടക്കുകയും ചെയ്തു. എല്ലാം വളരെ പെട്ടെന്നായിരുന്നു. പ്രേമിച്ച് നടക്കാനൊന്നും സമയം കിട്ടിയില്ല. ഇപ്പോള്‍, മമ്മി വളരെ ഹാപ്പിയാണ്. ദുബായിലേക്ക് രണ്ട് ടിക്കറ്റാണ് ബുക്ക് ചെയ്തിരിക്കുന്നത്. മമ്മിയില്ലാതെ താന്‍ എവിടെയും പോകില്ല. ഇക്കാര്യമാണ് ഇക്കയ്ക്ക് ഏറെ ഇഷ്ടം എന്നാണ് ഷംന പറയുന്നത്.
കണ്ണൂരില്‍ വച്ചാണ് ഷംനയുടെ നിക്കാഹ് നടന്നത്. ഒരാഴ്ച മുമ്പായിരുന്നു താരത്തിന്റെ വിവാഹം. ‘ഡെവിള്‍’ എന്ന തമിഴ് ചിത്രമാണ് ഷംനയുടെതായി പുറത്തിറങ്ങാനിരിക്കുന്നത്. മലയാള ചിത്രം ഇഷ്‌ക്കിന്റെ തമിഴ് റീമേക്കും, തെലുങ്കില്‍ ‘അസ്ലം’ എന്നീ രണ്ട് ചിത്രങ്ങളും റിലീസിന് ഒരുങ്ങുന്നുണ്ട്.
