കെപിഎസി ലളിതയുടെ ജന്മദിനത്തില്‍ ഹൃദയസ്പര്‍ശിയായ കുറിപ്പ് പങ്കുവച്ച് മകന്‍ സിദ്ധാര്‍ത്ഥ് ഭരതന്‍. ഫെബ്രുവരി 22ന് ആയിരുന്നു കെപിഎസി ലളിത ഓര്‍മ്മയായത്. പുതിയ ചിത്രം ജിന്നിന്റെ ടീസര്‍ പങ്കുവച്ചു കൊണ്ടാണ് താന്‍ വീണ്ടും ജോലിയില്‍ പ്രവേശിക്കുകയാണെന്ന് സിദ്ധാര്‍ത്ഥ് സോഷ്യല്‍ മീഡിയയില്‍ കുറിച്ചത്.
”അമ്മ മരിച്ചിട്ട് ഇന്നലെ 16 ദിവസം പൂര്‍ത്തിയായി. ഔദ്യോഗികമായ ദുഃഖാചരണം അതോടെ അവസാനിക്കുകയാണ്. ഇന്ന് അമ്മയുടെ ജന്മദിനം കൂടിയാണ്. ശുഭകരമായ ഈ ദിവസം തന്നെ എന്റെ പുതിയ ചിത്രമായ ‘ജിന്നി’ന്റെ ടീസര്‍ റിലീസ് ചെയ്തുകൊണ്ട് ജോലിയിലേക്ക് തിരികെ പ്രവേശിക്കാമെന്നു കരുതി.”
”അമ്മയുടെ വിയോഗത്തില്‍ നിന്ന് കര കയറാന്‍ നിങ്ങളുടെ ഓരോരുത്തരുടെയും പിന്തുണയും അനുഗ്രഹവും ഉണ്ടാകണം” എന്നാണ് സിദ്ധാര്‍ത്ഥ് ഭരതന്‍ സോഷ്യല്‍ മീഡിയയില്‍ കുറിച്ചിരിക്കുന്നത്. അതേസമയം, വര്‍ണ്യത്തില്‍ ആശങ്കയ്ക്ക് ശേഷം സിദ്ധാര്‍ത്ഥ് ഭരതന്‍ സംവിധാനം ചെയ്യുന്ന ചിത്രമാണ് ജിന്ന്.
സൗബിന്‍ ഷാഹിര്‍ നായകനാകുന്ന ചിത്രത്തില്‍ ഷറഫുദ്ദീന്‍, ഷൈന്‍ ടോം ചാക്കോ, സാബുമോന്‍, ജാഫര്‍ ഇടുക്കി, നിഷാന്ത് സാഗര്‍, സുധീഷ്, ശാന്തി ബാലചന്ദ്രന്‍, ലിയോണ ലിഷോയ്, കെപിഎസി ലളിത, ജിലു ജോസഫ്, ബിന്നി റിങ്കി ബെഞ്ചമിന്‍, ബേബി ഫിയോണ എന്നിവര്‍ ചിത്രത്തില്‍ അഭിനയിക്കുന്നു.