മമ്മൂട്ടിയുടെ ബ്രഹ്മാണ്ഡ ചിത്രം മാമാങ്കം റിലീസിന് തയ്യാറെടുക്കുകയാണ്. മമ്മൂട്ടിയുടെ കരിയറിലെ ഏറ്റവും വലിയ സിനിമയാണ് മാമാങ്കം എന്നതിനാല്‍ മലയാള സിനിമാ ലോകം ഏറെ ആകാംക്ഷയിലാണ്. എം ജയചന്ദ്രന്‍ ഗാനങ്ങള്‍ ഒരുക്കുന്ന ഈ ചിത്രത്തിന് പശ്ചാത്തല സംഗീതം ഒരുക്കുന്നത് ബോളിവുഡില്‍ നിന്നുള്ള അങ്കിത്- സഞ്ചിത് ടീം (ബെല്‍ഹാര ബ്രദേഴ്‌സ്) ആണ്. ബാക്ക്ഗ്രൗണ്ട് മ്യൂസിക് ഇല്ലാതെ തന്നെയുള്ള ഈ ചിത്രത്തിന്റെ എഡിറ്റഡ് വേര്‍ഷന്‍ തന്നെ അത്ഭുതകരമാണ് എന്നാണ് അവര്‍ പറയുന്നത്.
“സംഗീതം ഒന്നുമില്ലാതെ ഈ ചിത്രം കണ്ടു. സംഗീതം ഇല്ലാതെ തന്നെ ചിത്രം ഗംഭീരമായി വന്നിട്ടുണ്ട്. സംഗീതം ഇല്ലാതെ ചിത്രം കാണാന്‍ സാധിച്ചത് കൊണ്ട് തന്നെ ഒരു പുതുമ ഇതിന്റെ പശ്ചാത്തല സംഗീതം ഒരുക്കുമ്പോള്‍ കൊണ്ട് വരാന്‍ സഹായിച്ചിട്ടുണ്ട്. സംഗീതം കൂടി ചേരുമ്പോള്‍ ഈ ചിത്രം വേറെ തലത്തിലേക്ക് ഉയരും. ഇത്ര വലിയ ഒരു ചിത്രത്തിലൂടെ സൗത്ത് ഇന്ത്യന്‍ സിനിമയില്‍ അരങ്ങേറാന്‍ സാധിച്ചതും ഭാഗ്യമായാണ് കരുതുന്നത്.” ബെല്‍ഹാര ബ്രദേഴ്‌സ് പറഞ്ഞു. പദ്മാവത്, വാര്‍ തുടങ്ങിയ ബോളിവുഡ് ചിത്രങ്ങള്‍ക്ക് പശ്ചാത്തല സംഗീതം ഒരുക്കിയത് ബെല്‍ഹാര ബ്രദേഴ്‌സ് ആണ്.
മലയാളത്തില്‍ ഇതേ വരെ നിര്‍മ്മിച്ചിട്ടുള്ള ഏറ്റവും ചെലവേറിയ സിനിമയാണ് മാമാങ്കം. എം. പത്മകുമാറാണ് ചിത്രം സംവിധാനം ചെയ്യുന്നത്. ചിത്രത്തിന്റെ തിരക്കഥ ഒരുക്കിയത് ശങ്കര്‍ രാമകൃഷ്ണനാണ്. മലയാളത്തിനു പുറമേ, തമിഴ്, തെലുങ്ക്, ഹിന്ദി ഭാഷകളിലും ചിത്രം റിലീസ് ചെയ്യുന്നുണ്ട്. ഉണ്ണി മുകുന്ദന്‍, കനിഹ, അനു സിത്താര, സിദ്ദീഖ്, തരുണ്‍ അറോറ, സുദേവ് നായര്‍, സുരേഷ് കൃഷ്ണ, രതീഷ് കൃഷ്ണ, പ്രാചി തെഹ്ലാന്‍, മാസ്റ്റര്‍ അച്യുതന്‍ എന്നിവരാണ് ചിത്രത്തിലെ മറ്റ് താരങ്ങള്‍.
കാവ്യ ഫിലിം കമ്പനിയുടെ ബാനറില്‍ പ്രവാസി വ്യവസായിയായ വേണു കുന്നപ്പള്ളിയാണ് ഈ ചിത്രം നിര്‍മ്മിക്കുന്നത്. എം. ജയചന്ദ്രന്‍ ആണ് ചിത്രത്തിന് വേണ്ടി സംഗീതം ഒരുക്കുന്നത്. ചിത്രം നവംബര്‍ 21-ന് തിയേറ്ററുകളിലെത്തും.