സുകേഷ് ചന്ദ്രശേഖറിനെതിരെ നടി ജാക്വിലിന്‍ ഫെര്‍ണാണ്ടസ്. സുകേഷ് തന്റെ ജീവിതം നരകതുല്യമാക്കിയെന്നാണ് ജാക്വിലിന്‍ ദില്ലി ഹൈക്കോടതിയില്‍ അറിയിച്ചത്. 200 കോടിയുടെ തട്ടിപ്പ് കേസില്‍ ഇപ്പോള്‍ തീഹാര്‍ ജയിലിലാണ് സുകേഷ്. കേസില്‍ ജാക്വിലിന്‍ ഫെര്‍ണാണ്ടസ് പ്രതിയാണ്. ഇവരെ പലവട്ടം ഇഡി കേസില്‍ ചോദ്യം ചെയ്തിട്ടുണ്ട്.
ഇഡിയുടെ സമന്‍സ് കിട്ടിയപ്പോഴാണ് സുകേഷ് തട്ടിപ്പുകാരനാണെന്ന കാര്യവും അയാളുടെ യഥാര്‍ത്ഥ പേരും താനറിഞ്ഞത് എന്നാണ് ജാക്വിലിന്‍ കോടതിയില്‍ പറഞ്ഞത്. ഈ കേസില്‍ മറ്റൊരു ചലച്ചിത്രതാരമായ നോറ ഫത്തേഹിയുടെ മൊഴിയും കോടതി നേരത്തെ രേഖപ്പെടുത്തിയിരുന്നു.
സുകേഷ് തനിക്ക് പണവും ആഡംബര ബംഗ്ലാവും വാഗ്ദാനം ചെയ്തുവെന്ന് നോറ മൊഴി നല്‍കി. അയാളുടെ കാമുകിയാകണം എന്നതായിരുന്നു നിബന്ധന എന്നും നോറ മൊഴി നല്‍കി.
പിങ്കി ഇറാനിയാണ് തന്നെ സുകേഷിന് പരിചയപ്പെടുത്തിയത് എന്നാണ് ജാക്വിലിന്‍ കോടതിയില്‍ പറയുന്നത്.
സുകേഷ് കേന്ദ്ര സര്‍ക്കാറിനെ ഉയര്‍ന്ന ജീവനക്കാരനാണ് എന്നാണ് പിങ്കി പറഞ്ഞത്. എന്നാല്‍ ഇയാള്‍ തട്ടിപ്പുകാരനാണ് എന്ന് പിങ്കിക്ക് അറിയാമായിരുന്നു. അവര്‍ തന്നെ ചതിച്ചതാണെന്ന് ജാക്വിലിന്‍ പറയുന്നു.
പിന്നീട് അടുത്തപ്പോള്‍ നിരന്തരം സുകേഷ് തന്നോട് നുണകള്‍ പറഞ്ഞതായി ജാക്വിലിന്‍ പറയുന്നു. താന്‍ അന്തരിച്ച തമിഴ്‌നാട് മുഖ്യമന്ത്രി ജയലളിതയുടെ മരുമകനാണ് എന്ന് പറഞ്ഞു. സണ്‍ ടിവിയുടെ ഉടമയാണെന്നും പറഞ്ഞു. ജാക്വിലിന്‍ കൂടുതല്‍ തെന്നിന്ത്യന്‍ സിനിമയില്‍ ശ്രദ്ധ കേന്ദ്രീകരിക്കാന്‍ പറഞ്ഞു. തന്റെ ജീവിതവും കരിയറും നരകതുല്യമാക്കിയെന്ന് ജാക്വിലിന്‍ കോടതിയില്‍ നല്‍കിയ മൊഴിയില്‍ പറയുന്നു.