ബോളിവുഡ് മസാല ചിത്രങ്ങളില്‍ നിന്ന് വളരെ വ്യത്യസ്തമായുള്ള കഥാപാത്രം തനിക്ക് ലഭിച്ചത് ‘കെന്നഡി’ എന്ന ചിത്രത്തിലൂടെയെന്ന് നടി സണ്ണി ലിയോണ്‍ . അനുരാഗ് കശ്യപ് സംവിധാനം ചെയ്ത ചിത്രം കാന്‍ ഫിലിം ഫെസ്റ്റിവലില്‍ പ്രദര്‍ശനത്തിനെത്തിയതിന്റെ ഭാഗമായാണ് നടി ഇതിനെക്കുറിച്ച് സംസാരിച്ചത്.
’11 വര്‍ഷത്തെ കരിയറില്‍ ആദ്യമായാണ് എന്റെ കഥാപാത്രങ്ങളില്‍ നിന്ന് വ്യത്യസ്തമായ വേഷം ലഭിച്ചത്. പതിവ് കഥ രീതിയില്‍ നിന്ന് പ്രേക്ഷകര്‍ ആഗ്രഹിക്കുന്നതും വ്യത്യസ്ത ഉള്ളടക്കങ്ങളാണ്. കഴിഞ്ഞ വര്‍ഷം ഞാന്‍ മൂന്ന് സിനിമകള്‍ ചെയ്തു, അതില്‍ നിന്ന് വിഭിന്നമാണ് ഈ ചിത്രം’, നടി പറഞ്ഞു.
‘ഈ പ്രോജക്ടിനായി അനുരാഗ് കശ്യപ് എന്നെ സമീപിച്ചപ്പോള്‍ അത് അവിശ്വസനീയമായാണ് എനിക്ക് തോന്നിയത്. അദ്ദേഹത്തിന്റെ സിനിമാശൈലി എനിക്കിഷ്ടമാണ്, അദ്ദേഹത്തോടൊപ്പം നന്നായി ആസ്വദിച്ചാണ് ഞാന്‍ ജോലി ചെയ്തത്. അദ്ദേഹം എന്നിലെ അഭിനേത്രിയുടെ മറ്റൊരു വശമാണ് പുറത്തുകൊണ്ടുവന്നത്.
മറ്റ് സംവിധായകര്‍ ചിന്തിക്കാത്ത, ചെയ്യാത്ത വിധത്തില്‍. അത് ചെയ്യാന്‍ എന്നെ പ്രേരിപ്പിക്കുകയും ചെയ്തു. അദ്ദേഹത്തിന്റെ വീക്ഷണം അതിശയകരമാണ്. എന്റെ എക്കാലത്തെയും പ്രിയപ്പെട്ട അനുരാഗ് കശ്യപ് ചിത്രം ‘ഗാങ്സ് ഓഫ് വാസിപൂര്‍’ ആണ്, സണ്ണി ലിയോണ്‍ വ്യക്തമാക്കി.
ഈ വര്‍ഷത്തെ കാന്‍ ഫിലിം ഫെസ്റ്റിവലില്‍ അരങ്ങേറ്റം കുറിക്കാനുള്ള അവസരവും സണ്ണിക്ക് കെന്നഡി എന്ന ചിത്രത്തിലൂടെ ലഭിക്കുകയാണ്. കൂടാതെ മിഡ്നൈറ്റ് സ്‌ക്രീനിംഗ് വിഭാഗത്തിലാണ് ചിത്രം പ്രദര്‍ശിപ്പിക്കുക. തന്റെ സിനിമയുടെ പ്രീമിയറിനായി താരം പങ്കെടുക്കും. ‘ബോളിവുഡില്‍ ഇന്ന് എവിടെ എത്തി നില്‍ക്കുന്നു എന്ന് എനിക്ക് വിശ്വസിക്കാന്‍ കഴിയുന്നില്ല. അഭിനയിക്കുന്ന ഒരു സിനിമ പ്രശസ്തമായ ഒരിടത്ത് പ്രദര്‍ശിപ്പിക്കാന്‍ പോകുന്നതില്‍ വലിയ ആവേശത്തിലാണ്’, നടി വ്യക്തമാക്കി.