അടുത്ത കാലത്തായി സോഷ്യല്‍ മീഡിയയില്‍ ട്രെന്‍ഡിംഗ് ആയി തുടരുകയാണ് നടി തമന്ന. ‘ലസ്റ്റ് സ്‌റ്റോറീസ് 2’, ‘ജീ കര്‍ദാ’ എന്നീ വെബ് സീരിസുകളിലെ താരത്തിന്റെ പ്രകടനം ചര്‍ച്ചയായിരുന്നു. തുടര്‍ന്നാണ് ‘ജയിലര്‍’ ചിത്രത്തിലെ ‘കാവാലാ’ എന്ന ഗാനം എത്തിയത്. ഈ ഗാനം സോഷ്യല്‍ മീഡിയയില്‍ ട്രെന്‍ഡിംഗ് ആണ്.

തമന്ന നല്‍കിയ ഒരു അഭിമുഖത്തിലെ വാക്കുകളാണ് ഇപ്പോള്‍ ശ്രദ്ധ നേടിക്കൊണ്ടിരിക്കുന്നത്. താന്‍ മുമ്പ് ചെയ്ത ചിത്രങ്ങളില്‍ ചിലത് ഒഴിവാക്കാമായിരുന്നു എന്നാണ് തമന്ന ഇപ്പോള്‍ പറയുന്നത്. ഇനി ഒരിക്കലും കാണരുത് എന്ന് വിചാരിച്ച സിനിമ ഏതാണെന്ന ചോദ്യത്തിന് തമന്ന നല്‍കിയ മറുപടിയാണ് ശ്രദ്ധ നേടുന്നത്.

വിജയ് നായകനായ ‘സുറ’ സിനിമയെ കുറിച്ചാണ് ഗലാട്ട പ്ലസിന് നല്‍കിയ അഭിമുഖത്തില്‍ തമന്ന പറയുന്നത്. ഇന്നാണെങ്കില്‍ സുറയിലെ പല രംഗങ്ങളിലും താന്‍ അത്തരത്തില്‍ അഭിനയിക്കില്ലായിരുന്നു എന്നാണ് തമന്ന പറയുന്നത്. ”അഭിനയിച്ച ചിത്രങ്ങളിലെ അഭിനയം നന്നാക്കാമായിരുന്നു എന്ന് തോന്നിയിട്ടുണ്ട്.”

”അത്തരത്തില്‍ ഒരു ചിത്രം സുറയാണ്. ആ ചിത്രത്തിലെ പല സീനുകളിലും എന്റെ അഭിനയം മോശമായിരുന്നു. നന്നായി ചെയ്യാമായിരുന്നു എന്ന് പിന്നീട് തോന്നിയിട്ടുണ്ട്. അത് ഷൂട്ട് ചെയ്യുമ്പോള്‍ തന്നെ ഇത് തോന്നിയിരുന്നു. എന്നാല്‍ ആ ധാരണയില്‍ ഒരു ചിത്രം ഉപേക്ഷിക്കാന്‍ സാധിക്കില്ല.”

”എല്ലാ സിനിമകളും ജയം പരാജയം എന്നീ ഘടകങ്ങളെ ആശ്രയിച്ചല്ല നടക്കുന്നത്. കരാര്‍ ഒപ്പിട്ടാല്‍ എന്ത് സംഭവിച്ചാലും അത് പൂര്‍ത്തിയാക്കണം. സിനിമ വലിയ മുതല്‍മുടക്കുള്ള കാര്യമാണ്. അത് കൊണ്ട് എനിക്ക് എന്ത് തോന്നുന്നു എന്നതില്‍ കാര്യമില്ല” എന്നാണ് തമന്ന പറയുന്നത്.