ഒ.ടി.ടി സിനിമാ സീരിസുകളും ‘ജയിലര്‍’ ചിത്രത്തിലെ ഗാനവും ഹിറ്റ് ആയതോടെ തമന്നയുടെ താരമൂല്യം വര്‍ദ്ധിച്ചിട്ടുണ്ട്. മത്രമല്ല നടന്‍ വിജയ് വര്‍മയുമായുള്ള പ്രണയത്തെ തുടര്‍ന്ന് താരം എന്നും വാര്‍ത്തകളില്‍ നിറയാറുമുണ്ട്. ഇതിനിടെ തന്റെ ജീവിതത്തിലെ ഏറ്റവും വിഷമകരമായ ഘട്ടത്തെ കുറിച്ച് വെളിപ്പെടുത്തിയിരിക്കുകയാണ് തമന്ന.
ബോളിവുഡ് ബബിള്‍സിന് നല്‍കിയ അഭിമുഖത്തിലാണ് തന്റെ പിതാവ് രോഗബാധിതനായി വീണ രാത്രിയുടെ ഓര്‍മ്മ തമന്ന പങ്കുവച്ചത്. ”ഞാും അച്ഛനും വിമാനത്തില്‍ യാത്ര ചെയ്യുകയായിരുന്നു. അച്ഛന് ആമ്പിലിക്കല്‍ ഹെര്‍ണിയ എന്ന രോഗം ഉണ്ടായിരുന്നു. പെട്ടെന്നാണ് അദ്ദേഹം കുഴഞ്ഞു വീണത്.”
”അദ്ദേഹത്തെ പെട്ടെന്ന് ആശുപത്രിയിലേക്ക് എത്തിക്കുകയും അടിയന്തര ഓപ്പറേഷന് വിധേയമാക്കേണ്ടിയും വന്നു. ആ രാത്രി ഭീകരമായിരുന്നു. എന്റെ ജീവിതത്തിലെ ഏറ്റവും കരുത്തനായ മനുഷ്യനെ ഇത്രയും ദുര്‍ബലനായി ഞാന്‍ ഒരിക്കലും കണ്ടിരുന്നില്ല.”
”ആ സമയത്ത് ചെയ്യേണ്ടതൊക്കെ ചെയ്ത് ഞാന്‍ പിടിച്ചു നില്‍ക്കുകയായിരുന്നു. പക്ഷെ അതിന് ശേഷം ആ വേദനയും ഞെട്ടലും ഉള്ളില്‍ വച്ച് ഞാന്‍ നേരെ ജോലിക്ക് പോയി. അതൊരു തെറ്റായിരുന്നു. എനിക്ക് സെറ്റില്‍ വച്ച് സുഖമില്ലാതായി, ഞാന്‍ വീണു.”
”അതില്‍ നിന്നും ഞാന്‍ ഒരു കാര്യം പഠിച്ചു പേടിയും ഉത്കണ്ഠയും പ്രകടിപ്പിക്കാതെ ഉള്ളിലൊതുക്കിയാല്‍ അത് ശാരീരികമായി ബാധിക്കും അത് നമ്മളെ തളര്‍ത്തും. ചിലക്ക് അത് മാനസികമായി ബാധിക്കും. അതിനാല്‍ അത്തരം അനുഭവങ്ങള്‍ വന്നാല്‍ ആ സമയത്തെ വികാരം ഉള്ളിലൊതുക്കരുത് പ്രകടിപ്പിക്കണം” എന്നാണ് തമന്ന പറയുന്നത്.