നടൻ നാന പടേക്കർക്കെതിരെ നടി തനുശ്രീ ദത്ത മീ ടൂ ആരോപണം ഉന്നയിച്ചത് ഇന്ത്യൻ സിനിമാലോകത്തെ പിടിച്ചുകുലുക്കിയിരുന്നു. 2018- ലായിരുന്നു തനുശ്രീയുടെ വെളിപ്പെടുത്തൽ. കഴിഞ്ഞ ദിവസം തനുശ്രീക്കെതിരെ നാന പടേക്കർ രംഗത്തുവന്നതും വലിയ വാർത്തയായിരുന്നു. തനുശ്രീ പറഞ്ഞത് നുണയാണെന്നാണ് നാന പടേക്കർ പറഞ്ഞത്.
എന്നാൽ ഇപ്പോഴിതാ നാന പടേക്കറുടെ പ്രതികരണത്തിനെതിരെ രംഗത്തെത്തിയിരിക്കുകയാണ് തനുശ്രീ ദത്ത. നാന എത്ര വലിയ നുണയനാണെന്ന് ലോകത്തിന് ഇപ്പോൾ അറിയാമെന്നും, അയാളെ പിന്തുണച്ചിരുന്നവര്‍ ഇപ്പോൾ കടത്തിലാവുകയോ അയാളെ മാറ്റി നിര്‍ത്തുകയോ ചെയ്തുവെന്നും തനുശ്രീ ദത്ത പറയുന്നു. ശേഷം നിരവധി പേരാണ് തനുശ്രീയെ പിന്തുണച്ച് രംഗത്തെത്തിയത്.
“നാന എത്ര വലിയ നുണയനാണെന്ന് ലോകത്തിന് ഇപ്പോള്‍ അറിയാം, അനില്‍ ശര്‍മയുടെ ഷൂട്ടിംഗിനിടെ വാരാണസി പയ്യനെ തല്ലിയെ സംഭവത്തിന് ശേഷം. നാന ആദ്യം കരണത്തടിച്ചത് ഷൂട്ടിന്റെ ഭാഗമാണെന്ന് വരുത്തി തീര്‍ക്കാന്‍ നോക്കി. തന്റെ പ്രവര്‍ത്തി മറച്ചുപിടിക്കാന്‍ നോക്കിയതിന് തിരിച്ചടി കിട്ടിയപ്പോള്‍ അയാള്‍ യുടേണ്‍ എടുക്കുകയും മനസില്ലാ മനസോടെ മാപ്പ് പറയുകയും ചെയ്തു.
അയാള്‍ ഇപ്പോള്‍ ഭയന്നിരിക്കുകയാണ്. ബോളിവുഡിലെ അയാളുടെ സപ്പോര്‍ട്ടര്‍മാര്‍ കുറഞ്ഞു. അയാളെ പിന്തുണച്ചിരുന്നവര്‍ കടത്തിലാവുകയോ അയാളെ മാറ്റി നിര്‍ത്തുകയോ ചെയ്തു. അയാളുടെ മാനുപ്പുലേഷനുകള്‍ ആളുകള്‍ തിരിച്ചറിഞ്ഞു. അതിനാല്‍ ആറ് വര്‍ഷത്തിന് ശേഷം ഒരു ആരോപണത്തോട് പ്രതികരിച്ച് ശ്രദ്ധ നേടാന്‍ നോക്കുന്നത്. നാന പടേക്കര്‍ പാത്തളോജിക്കല്‍ നുണയന്‍ ആണ്.” എന്നാണ് സൂമിന് നൽകിയ അഭിമുഖത്തിൽ തനുശ്രീ ദത്ത പറഞ്ഞത്.