മോഹന്‍ലാല്‍ ചിത്രം ഉപേക്ഷിച്ചതിന് പിന്നിലെ കാരണം വ്യക്തമാക്കി സംവിധായകന്‍ ടിനു പാപ്പച്ചന്‍. താന്‍ കഥ പറഞ്ഞ മോഹന്‍ലാലിന് വര്‍ക്ക് ആയില്ല. അതുകൊണ്ട് ആ പ്രോജക്ട് മാറിപ്പോയി എന്നാണ് സംവിധായകന്‍ ഒരു അഭിമുഖത്തില്‍ വെളിപ്പെടുത്തിയിരിക്കുന്നത്. ഇത് പോലൊരു കഥ താന്‍ ചിയാന്‍ വിക്രമിനോടും പറഞ്ഞിട്ടുണ്ടെന്നും ടിനു പാപ്പച്ചന്‍ പറഞ്ഞു.
”ഞാന്‍ കഥ പറഞ്ഞിട്ടും വര്‍ക്ക് ആകാത്ത ആളുകളുണ്ട്. ഞാന്‍ മോഹന്‍ലാല്‍ സാറിനോട് കഥ പറഞ്ഞിട്ടുണ്ട്. പക്ഷെ അദ്ദേഹത്തിന് കഥ വര്‍ക്ക് ആയില്ല. അതാണ് ആ സിനിമ മാറിപ്പോകാനുള്ള കാരണം, പക്ഷെ ഇനിയും അദ്ദേഹത്തോട് കഥ പറയാനുള്ള അവസരമുണ്ട് എന്നാണ് ഞാന്‍ അറിഞ്ഞത്.”
”മോഹന്‍ലാല്‍ പോലെയുള്ള വലിയ നടനെ കഥ പറഞ്ഞ് തൃപ്തിപ്പെടുത്തുക എളുപ്പമല്ല. തമിഴ് സൂപ്പര്‍താരം വിക്രത്തോടും ഞാന്‍ ഇത്തരത്തില്‍ കഥ പറഞ്ഞിട്ടുണ്ട്. എന്നാല്‍ അത് അദ്ദേഹത്തിന് വര്‍ക്ക് ആയില്ല” എന്നും ടിനു പാപ്പച്ചന്‍ വ്യക്തമാക്കി.
അതേസമയം, ടിനു പാപ്പച്ചന്റെ സംവിധാനത്തില്‍ ഒരുങ്ങിയ ‘ചാവേര്‍’ ആണ് തിയേറ്ററില്‍ പ്രദര്‍ശനം തുടരുന്നത്. ജോയ് മാത്യു രചന നിര്‍വഹിച്ച ചിത്രത്തിന് സമ്മിശ്ര പ്രതികരണമാണ് ലഭിച്ചു കൊണ്ടിരിക്കുന്നത്. ചിത്രത്തിനെതിരെ കടുത്ത രീതിയിലുള്ള ഡീഗ്രേഡിംഗും നടക്കുന്നുണ്ട്.
