ലിജോ ജോസ് പെല്ലിശ്ശേരിയുടെ സഹസംവിധായകനായി പ്രവർത്തിച്ച് പിന്നീട് സ്വാതന്ത്ര്യം അർദ്ധരാത്രിയിൽ, അജഗജാന്തരം എന്നീ സിനിമകളിലൂടെ മലയാള സിനിമയിൽ തന്റേതായ സ്ഥാനമുണ്ടാക്കിയെടുത്ത സംവിധായകനാണ് ടിനു പാപ്പച്ചൻ.
കുഞ്ചാക്കോ ബോബനെ പ്രധാന കഥാപാത്രമാക്കി ടിനു പാപ്പച്ചൻ സംവിധാനം ചെയ്ത ഏറ്റവും പുതിയ ചിത്രമായ ‘ചാവേർ’ സമ്മിശ്ര പ്രതികരണങ്ങളുമായി തിയേറ്ററുകളിൽ പ്രദർശനം തുടരുകയാണ്. ഇപ്പോഴിതാ കേരളത്തിന്റെ നവോത്ഥാന നായകൻ മഹാത്മ അയ്യങ്കാളിയുടെ ജീവിതത്തെ ആസ്പദമാക്കി ഒരു മാസ്സ് സിനിമ ചെയ്യാൻ തനിക്ക് ആഗ്രഹമുണ്ടെന്ന് പറഞ്ഞിരിക്കുകയാണ് ടിനു പാപ്പച്ചൻ.
” എനിക്ക് വലിയ അറിവൊന്നുമില്ല, പക്ഷേ ഞാൻ വായിച്ചിട്ടുള്ള അറിവ് വെച്ച് മാസ് ഹീറോ ആരാണെന്ന് ചോദിച്ചാൽ ഞാൻ പറയും അയ്യങ്കാളി ആണെന്ന്. അയ്യങ്കാളിയുടെ സിനിമ എടുക്കണമെന്നത് എന്റെ വലിയൊരു ആഗ്രഹമാണ്. അതിനുവേണ്ടി ഞാൻ ശ്രമിക്കുന്നുണ്ട്. ഭാവിയിൽ നടക്കുമോ എന്ന് അറിയില്ല. അയ്യങ്കാളിയുടെ ജീവിതം കേരളം തിരസ്കരിച്ച ഒരു ചരിത്രമാണ്. അദ്ദേഹത്തെ വെച്ച് ഒരു മാസ് സിനിമ ഇതുവരെ ഉണ്ടായിട്ടില്ല എന്നാണ് എനിക്ക് തോന്നുന്നത്. കേരളം എത്രത്തോളം അദ്ദേഹത്തെ അഡ്രസ് ചെയ്തിട്ടുണ്ടെന്ന് ചോദിച്ചാൽ എനിക്കറിയില്ല.” സൈന സൌത്ത് പ്ലസിന് നൽകിയ അഭിമുഖത്തിലാണ് ടിനു പാപ്പച്ചൻ ഇങ്ങനെ അഭിപ്രായപെട്ടത്.
Read more
ചാവേറിൽ പറഞ്ഞിരിക്കുന്ന ജാതി പൊളിറ്റിക്സ് കാലാകാലങ്ങളായി അഡ്രസ്സ് ചെയ്യപ്പെടുകയും പെടാതിരിക്കുകയും ചെയ്യുന്ന ഒന്നാണെന്നും താഴ്ന്ന ജാതിക്കാരൻ ഉയർന്ന ജാതിക്കാരന്റെ കുടുംബത്തിൽ അംഗമാവുന്ന ഘട്ടം വരുമ്പോഴാണ് ജാതി മെക്കാനിസം വർക്ക് ആവുന്നതെനും ടിനു കൂട്ടിച്ചേർത്തു.
