ജനപ്രിയ പരമ്പരയായ “ഉപ്പും മുളകി”ലെ ലച്ചുവിന്റെ വിവാഹത്തിനായി ആകാംക്ഷയോടെയാണ് ആരാധകര്‍ കാത്തിരുന്നത്. ആയിരം എപ്പിസോഡുകള്‍ പൂര്‍ത്തീകരിച്ച പരമ്പരയെ ചുറ്റിപ്പറ്റിയുള്ള ചര്‍ച്ചകളും ബാലുവിന്റെ മകള്‍ ലച്ചുവിന്റെ വിവാഹവുമാണ് ഇപ്പോള്‍ സോഷ്യല്‍ മീഡിയയിലെ വൈറല്‍ ചര്‍ച്ച. തന്റെ മകളെ വിവാഹം കഴിപ്പിച്ചയക്കുമ്പോള്‍ ഒരു അച്ഛന്‍ അനുഭവിക്കുന്ന വൈകാരിക പരിസരങ്ങളെ ഗംഭീരമായി അടയാളപ്പെടുത്തിയ സീരിയലിലെ രംഗം അഭിനയിക്കുമ്പോള്‍ താന്‍ ശരിക്കും കരഞ്ഞു പോയെന്ന് പറയുകയാണ് ബാലു എന്ന കഥാപാത്രത്തെ അവതരിപ്പിക്കുന്ന ബിജു സോപാനം.
“ആ രംഗത്തില്‍ ഗ്ലിസറിനില്ലാതെ തന്നെ ഞാന്‍ ശരിക്കും കരഞ്ഞു പോയി. കരയുക എന്നത് തിരക്കഥയില്‍ ഇല്ലായിരുന്നു. ലച്ചുവിന് ഉപദേശം നല്‍കാന്‍ മാത്രമായിരുന്നു ഉദ്ദേശം. പക്ഷേ, ആ സീനില്‍ കണ്ണുനീര്‍ നിയന്ത്രിക്കാനായില്ല. ഇവര്‍ സ്‌ക്രീനില്‍ മാത്രമല്ല, ജീവിതത്തിലും മക്കളാണ്. അച്ഛനെന്നു തന്നെയാണ് അവരൊക്കെ വിളിക്കുന്നത്. സ്വന്തം മകളുടെ വിവാഹം നടക്കുന്ന ഒരു അച്ഛന്റെ വൈകാരിക സമീപനമാണ് എനിക്കുണ്ടായത്.” ടൈംസ് ഓഫ് ഇന്ത്യയുമായുള്ള അഭിമുഖത്തില്‍ ബിജു സോപാനം പറഞ്ഞു.
പരമ്പരയിലെ വിവാഹ വിശേഷം വൈറലായതോടെ ശരിക്കും ലച്ചുവിന്റെ കല്യാണം കഴിഞ്ഞോ എന്ന തരത്തിലുള്ള ചര്‍ച്ചകളും ചോദ്യങ്ങളും സമൂഹ മാധ്യമങ്ങളില്‍ ഉയര്‍ന്നിരുന്നു. ഇതേത്തുടര്‍ന്ന് ലച്ചു എന്ന കഥാപാത്രത്തെ അവതരിപ്പിക്കുന്ന ജൂഹി രുസ്തഗി തന്റെ വിവാഹം കഴിഞ്ഞിട്ടില്ലെന്ന് വ്യക്തമാക്കി രംഗത്തു വന്നിരുന്നു.