മലയാളികൾക്ക് ഏറെ പ്രിയങ്കരിയായ താരമാണ് നിത്യ മേനോൻ. മലയാളത്തിന് പുറമെ തമിഴിലും തെലുങ്കിലും സജീവമാണ് താരം. ഇപ്പോഴിതാ നിത്യ അഭിനയിച്ച ഒരു മലയാള ചിത്രത്തിലെ ഗാനം കൊറിയോഗ്രാഫ് ചെയ്യാതെ അഭിനയിച്ചതാണെന്ന് വെളിപ്പെടുത്തിയിരിക്കുകയാണ് നിത്യ മേനോൻ.
പൃഥ്വിരാജ്, ജെനീലിയ ഡിസൂസ, പ്രഭു, നിത്യ മേനോൻ തുടങ്ങിയവരെ പ്രധാന കഥാപാത്രങ്ങളാക്കി സന്തോഷ് ശിവൻ സംവിധാനം ചെയ്ത് 2011-ൽ പുറത്തിറങ്ങിയ ചിത്രമാണ് ‘ഉറുമി’. ചിത്രത്തിലെ ‘ചിമ്മി ചിമ്മി മിന്നി തിളങ്ങണ’ എന്നുതുടങ്ങുന്ന ഗാനം കൊറിയോഗ്രാഫ് ചെയ്യാതെ അഭിനയിച്ചതാണ് എന്നാണ് നിത്യ പറയുന്നത്.
“ആ പാട്ടിനെ കുറിച്ച് പറയുമ്പോൾ എൻ്റെ മനസിലേക്ക് പെട്ടെന്ന് കടന്ന് വരുന്ന കാര്യം, ആ പാട്ട് കൊറിയോഗ്രാഫ് ചെയ്യാതെ അഭിനയിച്ചതാണ് എന്നുള്ളതാണ്. അത് ഓൺ ദി സ്പോട്ടിൽ ചെയ്‌തതാണ്. സന്തോഷ് ശിവൻ അങ്ങനെ അധികം ഡയറക്‌ട് ചെയ്യുന്ന ആളല്ല. ഷൂട്ടിൻ്റെ സമയത്ത് എന്തെങ്കിലും ചെയ്തോളൂ എന്നാണ് പറയാറുള്ളത്.
ഒരു തവണ പാട്ടിൻ്റെ ഷൂട്ടിന് ഇടയിൽ ഞാൻ അഭിനയിക്കാൻ അവിടെ പോയി ഇരുന്നതും ‘ഇരിക്കുകയാണെങ്കിൽ ഇരുന്നോളൂ, ഇരുന്നിട്ട് വരികൾ പാടിയാൽ മതി’ എന്ന് പറഞ്ഞു. അത്തരത്തിൽ ആ പാട്ട് മുഴുവൻ ആദ്യമേ തന്നെ പ്ലാൻ ചെയ്ത് അഭിനയിച്ചതല്ല.
എനിക്ക് പാട്ടിന്റെ ലൈൻസ് തന്നിട്ട് ‘പ്രഭു സാറുമായി ഇരിക്കുന്നതായാണ് ഷോട്ട് ആരംഭിക്കുന്നത്. പിന്നെ സാർ അങ്ങനെ പോകുമ്പോൾ താൻ ആ വരികൾ പാടിയാൽ മതി’ എന്ന് സന്തോഷ് ശിവൻ പറഞ്ഞു. ബാക്കിയൊക്കെ ഞാൻ ഉണ്ടാക്കിയെടുത്തതാണ്.” എന്നാണ് ജിഞ്ചർ മീഡിയക്ക് നൽകിയ അഭിമുഖത്തിൽ നിത്യ മേനോൻ പറഞ്ഞത്.