‘വാരിസ്’ സിനിമയെ ടെലിവിഷന്‍ സീരിയലുകളുമായി താരതമ്യം ചെയ്ത വിമര്‍ശനങ്ങളില്‍ പ്രതികരിച്ച് സംവിധായകന്‍ വംശി പൈഡിപള്ളി. നിരൂപകരോട് തനിക്ക് ആദരമുണ്ട്, എന്നാല്‍ അവരെ തൃപ്തിപ്പെടുത്താനല്ല താന്‍ സിനിമ ചെയ്യുന്നത്. സീരിയലുകളും ക്രിയേറ്റീവ് ആയ ജോലിയാണ്. വീട്ടമ്മമാരുടെ ജീവിതം സീരിയലുകള്‍ മനോഹരമാക്കുന്നു എന്നാണ് സംവിധായകന്‍ പറയുന്നത്.
നിരൂപകരോട് തനിക്ക് ആദരമുണ്ട്. അത് വച്ച് തന്നെ പറയട്ടെ, അവരെ തൃപ്തിപ്പെടുത്താനല്ല താന്‍ സിനിമ ചെയ്യുന്നത്. പ്രേക്ഷകര്‍ക്കു വേണ്ടിയാണ്. നിരൂപകര്‍ സിനിമ കണ്ട് അവര്‍ക്ക് ഇഷ്ടപ്പെട്ടില്ലെങ്കില്‍ മോശമാണെന്ന് എഴുതുന്നു. അത് അവരുടെ മാത്രം അഭിപ്രായമാണ്. സാധാരണ പ്രേക്ഷകന്‍ അങ്ങനെയല്ല.
താന്‍ കണ്ട തിയേറ്ററിലെല്ലാം ചിത്രം കണ്ട ശേഷം എഴുന്നേറ്റ് നിന്ന് കയ്യടിക്കുകയായിരുന്നു. അവര്‍ക്ക് വേണ്ടിയാണ് താന്‍ സിനിമ എടുക്കുന്നത്. താന്‍ റിവ്യൂ വായിക്കാറില്ല. അതിനെ കുറിച്ച് അറിയാനും ശ്രമിക്കാറില്ല. ഒരു സിനിമ എടുക്കാനുള്ള ബുദ്ധിമുട്ട് എന്താണെന്ന് അറിയാമോ? എത്ര പേരാണ് സിനിമയുടെ പിന്നില്‍ പ്രവര്‍ത്തിക്കുന്നതെന്ന് അറിയാമോ?
ഇതൊരു തമാശയല്ല. ഒരു സംവിധായകന്‍ സിനിമയ്ക്ക് വേണ്ടി എത്ര ത്യാഗം ചെയ്യുന്നുണ്ടെന്ന് അറിയാമോ? ഇന്ത്യയിലെ ഏറ്റവും മികച്ച താരങ്ങളിലൊരാളായ വിജയ് സര്‍ ഒരു സിനിമയ്ക്കു വേണ്ടി എത്ര കഷ്ടപ്പെടുന്നുണ്ടെന്ന് അറിയാമോ? ഓരോ പാട്ടിനു മുമ്പും റിഹേഴ്‌സല്‍ നടത്തും.
ഡയലോഗുകള്‍ പറയുമ്പോള്‍ പോലും പ്രാക്ടീസ് ചെയ്ത ശേഷമെ ക്യാമറയ്ക്ക് മുന്നിലെത്താറുള്ളു. എന്തുകൊണ്ടാണ് സീരിയലുകളെ ഡീഗ്രേഡ് ചെയ്യുന്നത്. എത്രയോ ആളുകളാണ് വൈകുന്നേരം അത് രസിച്ചിരുന്ന് കാണുന്നതെന്ന് അറിയാമോ?
വീട്ടില്‍ പോയി നോക്കൂ, നിങ്ങളുടെ അമ്മയും അമ്മൂമ്മയുമൊക്കെ ഇത് കാണുന്നുണ്ടാകും. സീരിയലുകള്‍ കാരണം അവരുടെ ജീവിതം മനോഹരമായി മുന്നോട്ടുപോകുന്നു. എന്തിനാണ് അതിനെ ഡീഗ്രേഡ് ചെയ്യുന്നത്. അതും ഒരു ക്രിയേറ്റീവ് ജോലിയാണ് എന്നാണ് വംശി പൈഡിപള്ളി പറയുന്നത്.