മലയാള സിനിമയില്‍ ഗംഭീര തിരിച്ചു വരവിന് ഒരുങ്ങുകയാണ് നടി വാണി വിശ്വനാഥ്. പണ്ട് ചെയ്ത ശക്തമായ കഥാപാത്രങ്ങളാണ് വാണിക്ക് ഇന്നും ജനപ്രീതി നിലനില്‍ക്കാനുള്ള കാരണം. എന്നാല്‍ പഴയ സിനിമകളില്‍ പുകവലിക്കുന്നതും മദ്യപിക്കുന്നതുമായ കഥാപാത്രങ്ങള്‍ ചെയ്തതിനാല്‍, വാണി യഥാര്‍ത്ഥ ജീവിതത്തിലും അങ്ങനെ തന്നെയാണ് എന്നാണ് പലരുടെയും ചിന്ത.
പലരും അങ്ങനെയാണ് ഇപ്പോഴും തന്നെ കുറിച്ച് ചിന്തിച്ച് വച്ചിരിക്കുന്നത് എന്നാണ് വാണി പറയുന്നത്. 2000ല്‍ പുറത്തിറങ്ങിയ സൂസന്ന എന്ന സിനിമയില്‍ മദ്യപിക്കുകയും സിഗരറ്റ് വലിക്കുകയും ചെയ്യുന്ന കഥാപാത്രത്തെയാണ് വാണി അവതരിപ്പിച്ചത്. വളരെ കഷ്ടപ്പെട്ടാണ് ഈ സിനിമയിലെ ചില സീനുകള്‍ ചെയ്തത് എന്നാണ് വാണി ക്യൂ സ്റ്റുഡിയോക്ക് നല്‍കിയ അഭിമുഖത്തില്‍ പറയുന്നത്.
മദ്യപിക്കുകയും സിഗരറ്റ് വലിക്കുകയും വേണം. അതൊക്കെ ചെയ്യാന്‍ എനിക്ക് പറ്റില്ലായിരുന്നു. വലിക്കുമ്പോള്‍ ചുമ വരും. ഇന്നത്തെ പോലെ ഡിജിറ്റല്‍ അല്ല ഫിലിമാണ്. അത്രയും അഭിനയിച്ച് വന്ന ഷോട്ട് പെട്ടെന്ന് നിര്‍ത്തും. അത് പ്രശ്‌നമായിരുന്നു. കുറച്ചൊക്കെ പഠിച്ച ശേഷമാണ് പിന്നീട് അഭിനയിച്ചത്.
ഇപ്പോള്‍ ചെയ്ത ആസാദി എന്ന സിനിമയിലും ഇങ്ങനെയൊരു സീനുണ്ടായിരുന്നു. അവര്‍ക്ക് പിന്നെ എന്നെ വിശ്വാസമുള്ളത് പോലെയായിരുന്നു. ഏത് ബ്രാന്‍ഡാണ് വലിക്കുക, അതൊന്ന് വാങ്ങിച്ച് വയ്ക്കാനായിരുന്നു എന്ന് പറഞ്ഞു. നിങ്ങളൊക്കെ ഇങ്ങനെയാണോ വിചാരിച്ച് വച്ചിരിക്കുന്നതെന്ന് താന്‍ തിരിച്ചു ചോദിച്ചു എന്നാണ് വാണി വിശ്വനാഥ് പറയുന്നത്.
അതേസമയം, ഒരു അന്വേഷണത്തിന്റെ തുടക്കം ആണ് വാണിയുടെ പുതിയ സിനിമ. എംഎ നിഷാദാണ് ചിത്രം സംവിധാനം ചെയ്യുന്നത്. നവംബര്‍ 8ന് ആണ് സിനിമ റിലീസിന് ഒരുങ്ങുന്നത്. ബെന്‍സി പ്രൊഡക്ഷന്‍സിന്റെ ബാനറില്‍ കെ വി അബ്ദുല്‍ നാസറാണ് ചിത്രം നിര്‍മ്മിച്ചിരിക്കുന്നത്.