‘ലിയോ’യെ കുറിച്ചുള്ള വിവാദങ്ങള്‍ ഉയരുന്നതിനിടെ വിജയ്‌യും ലോകേഷ് കനകരാജും തമ്മില്‍ ശത്രുതയിലാണെന്ന് അഭ്യൂഹങ്ങള്‍. സോഷ്യല്‍ മീഡിയയിലാണ് ഇത്തരം അഭ്യൂഹങ്ങള്‍ പ്രചരിച്ചത്. ലിയോയിലെ ‘നാ റെഡി താ’ എന്ന ഗാനത്തിന് ശേഷം ഇരുവരും തമ്മില്‍ പ്രശ്നങ്ങള്‍ രൂപപ്പെട്ടു എന്നാണ് ചിലരുടെ കണ്ടെത്തലുകള്‍.
അതിന് ശേഷമുള്ള പ്രമോഷനുകളിലൊന്നും ലോകേഷ്, വിജയ് എന്ന ഹാഷ്ടാഗ് പോസ്റ്റ് ചെയ്തില്ല എന്നാണ് ഒരു വിഭാഗത്തിന്റെ കണ്ടെത്തല്‍. എന്നാല്‍ ഇതിന്റെ പേരില്‍ പ്രശ്നത്തിലായിരിക്കുന്നത് സംവിധായകന്‍ വിഘ്നേഷ് ശിവനാണ്. വിജയ്‌യും ലോകേഷും തെറ്റിപ്പിരിഞ്ഞു എന്ന ഒരു പോസ്റ്റിന് ലൈക്ക് ചെയ്തതോടെയാണ് വിഘ്നേഷ് എയറിലായത്.
സംഭവം വിവാദമായതോടെ ക്ഷമാപണവുമായി വിഘ്നേഷ് തന്നെ രംഗത്തെത്തി. പോസ്റ്റ് വായിച്ചു നോക്കാതെ ലൈക്ക് ചെയ്യുകയായിരുന്നു എന്നാണ് വിഘ്നേഷ് കുറിച്ചത്. കൂടാതെ നയന്‍താരയേയും തൃഷയേയും കുറിച്ചുള്ള ഒരു വീഡിയോയും ലൈക്ക് ചെയ്തിരുന്നു. ഇതിനെ കുറിച്ചും വിഘ്നേഷ് വ്യക്തമാക്കി.
”പ്രിയപ്പെട്ട വിജയ് ആരാധകരെ, ലോകി ആരാധകരെ… നിങ്ങളെ ആശയക്കുഴപ്പത്തിലാക്കിയതിന് ക്ഷമ ചോദിക്കുന്നു. ട്വീറ്റില്‍ പറഞ്ഞിരിക്കുന്നത് കാണാതെ ലോകിയുടെ അഭിമുഖം മാത്രം കണ്ടാണ് ഞാന്‍ അത് ലൈക്ക് ചെയ്തത്. കാരണം ഞാന്‍ ലോകിയുടെ സിനിമകളുടേയും അഭിമുഖങ്ങളുടേയും വലിയ ആരാധകനാണ്.”
”ദളപതി വിജയ് സാറിന്റെ ലിയോയ്ക്കായി ഏറെ പ്രതീക്ഷയോടെയാണ് ഞാന്‍ കാത്തിരിക്കുന്നത്. ലോകി ബ്രോയുടെ ചിത്രം കണ്ട പോലെ തന്നെ നയന്റെ ഒരു വീഡിയോ ക്ലിപ്പും ഞാന്‍ കാണുകയുണ്ടായി. അതിമനോഹരമായ പ്രകടനം കാഴ്ചവച്ചിട്ടുള്ള എന്റെ പ്രിയപ്പെട്ട രംഗം കണ്ടപ്പോള്‍ ഞാന്‍ അത് അപ്പോള്‍ തന്നെ ലൈക്ക് ചെയ്യുകയായിരുന്നു.”
”എന്റെ തെറ്റാണ്. ഞാന്‍ അതിലെ വീഡിയോ കാണുകയോ ട്വീറ്റ് വായിക്കുകയോ ചെയ്തില്ല. ഞാന്‍ കുറച്ചുകൂടി ശ്രദ്ധിക്കേണ്ടതായുണ്ട്. ഇങ്ങനെയൊരു ചെറിയ തെറ്റ് എന്റെ ഭാഗത്ത് നിന്നുണ്ടായി. ലോകത്തിലെ എല്ലാ വിജയ് ആരാധകരോടും ഞാന്‍ ക്ഷമ പറയുന്നു” എന്ന് വിഘ്നേഷ് ട്വീറ്റ് ചെയ്തു.
Read more
