അടുത്തിടെയായി തുടര്‍ച്ചയായി ഫ്‌ളോപ്പ് ചിത്രങ്ങള്‍ ചെയ്ത താരമാണ് വിജയ് ദേവരകൊണ്ട. തിയേറ്ററില്‍ ഫ്‌ളോപ്പ് ആയ സിനിമകളുടെ നിര്‍മ്മാതാക്കള്‍ക്ക് തന്റെ പ്രതിഫലത്തിന്റെ പകുതി താരം മടക്കി നല്‍കാറുണ്ട്. സ്വന്തമായി പ്രൈവറ്റ് ജെറ്റും ആഡംബര കാറുകളും ഇദ്ദേഹത്തിന് സ്വന്തമായുണ്ട്.
എങ്കിലും മിഡില്‍ ക്ലാസ് ആയി ജീവിക്കാനാണ് തനിക്കിഷ്ടമെന്ന് നടന്‍ തന്നെ തുറന്നു പറഞ്ഞിട്ടുണ്ട്. ‘ലൈഗര്‍’ എന്ന സിനിമയുടെ പ്രമോഷനിടെ ചപ്പല്‍ ധരിച്ചുകൊണ്ട് എത്തിയതിനെ കുറിച്ച് താരം തുറന്നു സംസാരിച്ചിട്ടുമുണ്ട്. ”സിനിമയില്‍ വന്ന ശേഷം എന്റെ ജീവിതം വളരെയധികം മാറി.”
”പക്ഷെ ഉള്ളിന്റെ ഉള്ളില്‍, ഞാന്‍ ഇപ്പോഴും ആ മിഡില്‍ ക്ലാസ് കുട്ടിയാണ്. ഷാംപൂ കുപ്പി ഏതാണ്ട് കാലിയാകുമ്പോള്‍ വെള്ളം ഒഴിക്കുന്ന ശീലം എനിക്കിപ്പോഴും ഉണ്ട്, അതിനാല്‍ അത് വലിച്ചെറിയുന്നതിന് മുമ്പ് ഞാന്‍ അത് പരമാവധി പ്രയോജനപ്പെടുത്തുന്നു.”
”എനിക്ക് മനസില്‍ തോന്നുന്ന വസ്ത്രമാണ് ധരിക്കാറുള്ളത്. പ്രമോഷനുകള്‍ക്കായി ഉചിതമായ വസ്ത്രങ്ങളും ഷൂകളും തിരയാന്‍ വളരെയധികം സമയം എടുക്കുമായിരുന്നു. അതിനാല്‍, അക്കാര്യം എളുപ്പമാക്കാന്‍ ചപ്പലുകള്‍ ധരിക്കും” എന്നാണ് വിജയ് ദേവരകൊണ്ട പറയുന്നത്. താരത്തിന്റെ 35-ാം പിറന്നാള്‍ ദിനത്തിലാണ് വിജയ്‌യുടെ വാക്കുകള്‍ വീണ്ടും ശ്രദ്ധ നേടുന്നത്.
അതേസമയം, വിജയ് ദേവരകൊണ്ടയുടെതായി ഒടുവില്‍ പുറത്തിറങ്ങിയ ‘ഫാമിലി സ്റ്റാര്‍’ എന്ന ചിത്രം പരാജയമായിരുന്നു. 50 കോടി ബജറ്റില്‍ ഒരുക്കിയ ചിത്രത്തിന് 19.78 കോടി രൂപ മാത്രമാണ് നേടാനായത്. അര്‍ജുന്‍ റെഡ്ഡി, ഗീതാഗോവിന്ദം എന്നീ രണ്ട് സിനിമകള്‍ ഒഴിച്ചാല്‍ മറ്റൊരു ഹിറ്റും താരത്തിന് നേടാനായിട്ടില്ല.