ഹോം ചിത്രത്തിന്റെ ബോളിവുഡ് റീമേക്ക് ഒരുങ്ങുന്നുവെന്ന സന്തോഷം പങ്കുവെച്ച് നടനും നിർമ്മാതാവുമായ വിജയ് ബാബു. വര്‍ഷങ്ങള്‍ക്ക് മുമ്പ് താന്‍ മുംബൈയില്‍ സിനിമാജീവിതം ആരംഭിച്ചപ്പോള്‍ മുംബൈ ടൈംസിന്റെ ഒന്നാം പേജില്‍ ഇടം നേടാനും ബോളിവുഡിന്റെ ഭാഗമാകാനും സ്വപ്നം കണ്ടിരുന്നു. അതിപ്പോള്‍ സാദ്ധ്യമാവുകയാണ് എന്നാണ് വിജയ് ബാബു പറയുന്നത്.
”21 വര്‍ഷങ്ങള്‍ക്ക് മുമ്പ് ഞാന്‍ മുംബൈയില്‍ എന്റെ സിനിമ ജീവിതം ആരംഭിച്ചപ്പോള്‍ മുംബൈ ടൈംസിന്റെ ഒന്നാം പേജില്‍ ഇടം നേടാനും ബോളിവുഡിന്റെ ഭാഗമാകാനും ഞാന്‍ സ്വപ്നം കണ്ടു. ഹോമിലൂടെ അത് സാദ്ധ്യമായി. ഈ യാത്രയില്‍ ഭാഗമായ എല്ലാവരേയും ഓര്‍ക്കുന്നു.”
”ജീവിതത്തിലെ എല്ലാ ഉയര്‍ച്ചകളും താഴ്ചകളും ഒരുപാട് പാഠങ്ങള്‍ പഠിപ്പിച്ചു. അങ്കമാലി ഡയറീസ് എന്ന ചിത്രത്തിന് ശേഷം രണ്ടാം തവണയും അബാഡന്‍ഷ്യേ എന്റര്‍ടെയ്‌മെന്റ്‌സിനൊപ്പം ചേരുന്നതിന്റെ ആവേശം. ഹിന്ദി റീമേക്കിലൂടെ ഹോം കൂടുതല്‍ പ്രേക്ഷകരിലേക്ക് എത്തിക്കാന്‍ കാത്തിരിക്കുന്നു” എന്നാണ് വിജയ് ബാബു ഫെയ്‌സ്ബുക്കില്‍ കുറിച്ചു.
ഇന്ദ്രന്‍സിനെ നായകനാക്കി റോജിന്‍ തോമസ് സംവിധാനം ചെയ്ത ചിത്രമാണ് ഹോം. കുടുംബചിത്രമായി ഒരുക്കിയ ഹോം പ്രേക്ഷക ശ്രദ്ധയും നിരൂപക പ്രശംസയും ഒരു പോലെ നേടിയിരുന്നു. ശ്രീനാഥ് ഭാസി, മഞ്ജു പിള്ള, നസ്ലിന്‍, വിജയ് ബാബു, ജോണി ആന്റണി, പ്രിയങ്ക നായര്‍, മിനോണ്‍ എന്നിവരാണ് ചിത്രത്തിലെ മറ്റ് അഭിനേതാക്കള്‍.