അഞ്ച് വര്‍ഷം നീണ്ട പ്രണയത്തിനൊടുവിലാണ് നടി അപര്‍ണ ദാസും നടന്‍ ദീപക് പറമ്പോലും വിവാഹിതരായത്. സിനിമയില്‍ വളരെ ചുരുക്കം പേര്‍ക്ക് മാത്രമേ ഇവരുടെ പ്രണയത്തെ കുറിച്ച് അറിവ് ഉണ്ടായിരുന്നുള്ളു. 2019ല്‍ ‘മനോഹരം’ എന്ന ചിത്രത്തില്‍ അഭിനയിച്ചപ്പോള്‍ മുതലുള്ള സൗഹൃദമാണ് പിന്നീട് പ്രണയമായി മാറിയത്.
എന്നാല്‍ അപര്‍ണയുടെയും ദീപക്കിന്റെയും പ്രണയം കൈയ്യോടെ പൊക്കിയ ആളാണ് താനെന്ന് തുറന്നു പറഞ്ഞിരിക്കുകയാണ് വിനീത് ഇപ്പോള്‍. ”മനോഹരത്തിന്റെ സെറ്റില്‍ വച്ചാണ് ഇരുവരും തമ്മില്‍ ഇഷ്ടത്തിലാവുന്നത്. അതിന്റെ പ്രമോഷന് പോവുന്ന സമയത്താണ് ഞാനും ബേസിലും കൂടി ഇത് പിടിക്കുന്നത്.”
”ഇതുവരെ അപര്‍ണയും നമ്മളോട് കാര്യം പറഞ്ഞില്ല, ദീപക്കും പറഞ്ഞില്ല. പ്രമോഷന് അഭിമുഖത്തിന് പോയ സമയത്ത് നമുക്കൊരു സ്‌പെല്ലിംഗ് മിസ്റ്റേക്ക് തോന്നി നമ്മള് പിടിച്ചു. സൂചനകള്‍ കിട്ടുമല്ലോ. നാട്ടുകാര് ക്രിഞ്ച് എന്നൊക്കെ പറഞ്ഞാലും ഇതില്‍ എനിക്കൊരു സ്‌കില്‍ ഉണ്ട്” എന്നാണ് വിനീത് ക്ലബ്ബ് എഫ്എമ്മിന് നല്‍കിയ അഭിമുഖത്തില്‍ പറയുന്നത്.
വിവാഹ വാര്‍ത്ത അനൗണ്‍സ് ചെയ്തുകൊണ്ട് ദീപക് പങ്കുവച്ച വീഡിയോ വിനീത് ശ്രീനിവാസന്റെ സംഭഷണമായിരുന്നു. മനോഹരം എന്ന ചിത്രത്തില്‍ വിനീതിന്റെ കഥാപാത്രം ദീപക്കിന്റെ കഥാപാത്രത്തെ കുറിച്ച് അപര്‍ണയുടെ കഥാപാത്രത്തോട് പറയുന്ന ഭാഗമാണ് വീഡിയോയില്‍ ഉള്ളത്.
‘ഈ നാറിയെ ചെറുപ്പം തൊട്ടേ എനിക്കറിയാം. ഇവനെക്കാളും വലിയ വായിനോക്കി ഈ പഞ്ചായത്തില്‍ വേറെ ഇല്ല. ഇവന്റെ വീട്ടില്‍ ഫോട്ടോഷോപ്പ് എന്നല്ല വെളിച്ചെണ്ണ വാങ്ങാന്‍ നീ വന്നു എന്നറിഞ്ഞാല്‍ അതിനെക്കാളും വലിയ അപമാനം വേറെ ഉണ്ടാവൂല,’ എന്നാണ് വിനീത് പറയുന്നത്. ‘വിനീതേട്ടന്‍ പണ്ടേ അവളോട് പറഞ്ഞതാ, എന്നെ ട്രോളാന്‍ ഞാന്‍ വേറെ ആരെയും സമ്മതിക്കൂല്ല,’ എന്ന അടിക്കുറിപ്പോടെയാണ് ദീപക് വീഡിയോ പങ്കുവച്ചത്.